| ← 1Chronicles (14/29) → |
| 1. | UHiramu inkosi yeTire wasethuma izithunywa kuDavida, lezigodo zemisedari lababazi bamatshe lababazi bezigodo ukumakhela indlu. |
| 2. | UDavida wasesazi ukuthi i Nkosi yayimmisile ukuthi abe yinkosi phezu kukaIsrayeli, ngoba umbuso wakhe wawuphakanyiselwe phezulu ngenxa yabantu bayo uIsrayeli. |
| 3. | UDavida wasethatha abanye abafazi eJerusalema; uDavida wasezala amanye amadodana lamadodakazi. |
| 4. | Lala ngamabizo abantwana aba labo eJerusalema: OShamuwa, loShobabi, uNathani, loSolomoni, |
| 5. | loIbihari, loElishuwa, loEliphaleti, |
| 6. | loNoga, loNefegi, loJafiya, |
| 7. | loElishama, loBeyeliyada, loElifaleti. |
| 8. | AmaFilisti esezwile ukuthi uDavida ugcotshiwe ukuthi abe yinkosi phezu kukaIsrayeli wonke, wonke amaFilisti enyuka ukudinga uDavida; uDavida ekuzwa waphuma uku ya melana lawo. |
| 9. | AmaFilisti asefika azisabalalisa esihotsheni seRefayimi. |
| 10. | UDavida wasebuza kuNkulunkulu esithi: Ngenyukele yini kumaFilisti? Uzawanikela esandleni sami yini? I Nkosi yasisithi kuye: Yenyuka, ngoba ngizawanikela esandleni sakho. |
| 11. | Basebesenyukela eBhali-Perazimi, uDavida wawatshaya lapho; uDavida wasesithi: UNkulunkulu ufohlele ezitheni zami ngesandla sami njengokufohla kwamanzi. Ngenxa yalokhu babiza leyondawo ngokuthi yiBhali-Perazimi. |
| 12. | Asetshiya onkulunkulu bawo lapho, uDavida wasesithi kabatshiswe ngomlilo. |
| 13. | AmaFilisti asebuya ezisabalalisa esihotsheni futhi. |
| 14. | Lapho uDavida ebuza futhi kuNkulunkulu, uNkulunkulu wathi kuye: Ungenyukeli ngemva kwawo, agombolozele usuka kiwo, uze kuwo maqondana lezihlahla zebhalisamu. |
| 15. | Kuzakuthi-ke lapho usizwa umsindo wokuhamba ezihlokweni zezihlahla zebhalisamu, ubusuphumela empini, ngoba uNkulunkulu uzabe esephume phambi kwakho ukutshaya ibutho lamaFilisti. |
| 16. | Ngakho uDavida wenza njengoba uNkulunkulu emlayile; basebetshaya ibutho lamaFilisti kusukela eGibeyoni kwaze kwaba seGezeri. |
| 17. | Njalo ibizo likaDavida laphumela kuwo wonke amazwe; i Nkosi yasibeka ukwesabeka kwakhe phezu kwazo zonke izizwe. |
| ← 1Chronicles (14/29) → |