←  Romans (3/16)  →
1. A nih leh, Juda mi chuan sawtna eng nge a neih chuan bik? Serhtan pawh eng nge a sawtna?
2. Kawng tinah a sawt hle; Pathian thute an hnenah kawltirin a awm avang a ni ber a.
3. Mi thenkhatten rinna nei lo mah se la, eng nge maw tichuang le? An rin lohna chuan Pathian rinawmzia engmah loah a siam chuang em ni?
4. Hnai lo e; Pathian chu mi dik tak ni se la, mi tin erawh chu dawthei ni zawk rawh se; "Nangin i thusawiin thiam i chan theih a, rorela i awm pawhin i hneh theihna'n," tih ziak ang khan.
5. Nimahsela kan fel lohna hian Pathian felna chu a tihlan mawi lehzual chuan eng nge kan sawi ang? Pathianin mi a hrem hian mi fel lo a ni em ni? (Mihring dan angin ka sawi a ni).
6. Hnai lo e; chuti a nih chuan Pathianin engtin nge khawvel ro a rel ang?
7. Nimahsela ka dawt thusawi avanga Pathian thu dikzia amah tiropui khawp hiala a lan lehzual si chuan, engati nge kei pawh mi sual anga thiam loh chantira ka la awm ni?
8. Engti nge (min hek a, mi thenkhatin sawi loh pui min sawitir angin) "Thil tha a lo thlen theihna'n thil sual i ti ang u," tiin kan sawi zawk loh? Chutiang mite chuan thiam loh an chan chu a fel a ni.
9. A nih leh anni aiin kan tha chuang bik em ni? Hnai lo e; Judate leh Grikte chu sual bawiha awm vekah tun hma lam pawh kan puh tawh kha;
10. Tumah mi fel tak reng an awm lo, pakhat mah an awm hauh lo;
11. Tumah hre thiam reng an awm lo, tumah Pathian zawng reng an awm lo.
12. A ni lo lamah an peng ta vek a; engmaha tlaktlai loin an lo awm ta vek a, Tumah thil tha ti reng an awm lo, pakhat te mah an awm hauh lo.
13. An hrawk chu thlan inhawng a ni a; an leiin bumna thu an sawi a, an kam chhungah rul tur a awm a.
14. An ka chu anchhe lawhna leh thu khain a khat a.
15. An ke chu thisen chhuah turin a pen chak a;
16. An kawngah chuan boralna leh hrehawmna a awm a;
17. Thlamuanna kawng pawh an hre lo.
18. An mithmuhah Pathian tihna reng a awm lo, tih ziak ang khan.
19. Danin engpawh a sawi apiang chu, Dan thu thua awmte hnenah a sawi a ni tih kan hria a; ka tinreng a chip theihna'n leh khawvela mi zawng zawng Pathian rorelin an awm theihna'n.
20. Chutichuan Dan thiltih avangin mi tumah a mithmuhin thiam changing an awm lo ang; Dan avangin sual hriat famkimna a lo awm a ni si a.
21. Nimahsela tunah Dan leh Zawlneite hriattir angin Dan loa Pathian felna chu tihlanin a awm ta;
22. chu chu Pathian felna, Isua Krista rin avanga a ring apiangte hnena tihlana awm chu a ni; danglamna reng a awm lo a,
23. mi zawng zawngin thil an tisual tawh vek a, Pathian ropuina an chang zo ta lo a ni;
24. chung ringtute chu, Krista Isuaa tlanna awm avang chuan, a khawngaihnain a thlawna thiam chantirin an awm a;
25. Pathian dawhtheihnaa hman lai sualte haiderin a awm avang khan, Pathianin ama felzia entirna'n Krista Isua chu, a thisena, rinna avanga, sual thuphachawinaah a ruat a;
26. tun laia a felzia entirna'n a ni, amah ngei chu mi fel a nih theihna tur leh, Isua ring apiang thiam chantirtu a nih theihna turin.
27. Inchhuanna chu khawiah nge a awm ni le? Pawn lama khar hnanin a awm ta. Eng danin nge ni le? Thiltihna danin em ni? Ni lo e, rinna danin a ni zawk,
28. Chutichuan Dan thiltih ni loin, rinnain miin thiam changing kan ruat a ni.
29. Pathian chu Judate Pathian chauh em ni? Jentailte Pathian pawh a ni ve lo em ni? Ni ve e.
30. Serhtante chu an rin avanga thiam chantirtu tur leh, serhtan lohte chu an rin azara thiam chantirtu tur chu Pathian pakhat chauh a nih si chuan, Jentailte Pathian pawh a ni ve ang chu.A nih leh, rin avangin Dan chu engmah loah kan siam em ni? Hnai lo e, Dan chu kan tinghet zawk a ni.
31. A nih leh, rin avangin Dan chu engmah loah kan siam em ni? Hnai lo e, Dan chu kan tinghet zawk a ni.
←  Romans (3/16)  →