←  Judges (4/21)  →
1. Ehuda thih hnu chuan Israela thlahten LALPA mithmuhin thil sual an lo ti leh ta a.
2. Tichuan Hazor khaw thuttu, Kanaan ram lal Jabina hnenah chuan LALPA'n a hralh ta a: chu mi sipai hotu ber chu Sisera a ni a, Jentail-te ram Haroseth khuaa awm a ni.
3. tin, Israela thlahte chuan LALPA an au va: ani chuan thiir tawlailir zakua lai a nei si a; tin, kum sawmhnih chhung zet Israela thlahte chu nasa takin a hnehchhiah a ni.
4. Tin, chung lai chuan zawlnei Bebori, Lalpidotha nupuiin Israelte ro a rel a.
5. Ephraim tlang rama Rama leh Bethel khaw inkara Debor tum thing hnuaiah a awm thin a: tin, Israela thlahte chu a hnenah an ro reltir turin an kal thin.
6. Tin, Kedes-naphtali ram ata Abinoama fapa Baraka chu a chah a, a hnenah, "LALPA Israelte pathianin, 'Tabor tlangah han kal langin, Naphtalia thlahte leh Zebuluna thlahte mi singkhat hruai rawh.
7. Tichuan Kison luiah Jabina sipai hotu Sisera chu a tawlailirte leh a hote nen ka rawn tir ang a; tin, ani chu ka pe che,' tiin thu a pe a ni lo'm ni?" a ti a.
8. Tin, Barakan a hnenah, "Mi kalpui ve la, tichuan ka kal ang e: mi kalpui ve dawn loh erawh chuan ka kal lo ang," a ti a.
9. Tin, ani chuan, "Ka kalpui ve mawlh ang che: amaherawhchu i kalnaah chuan hming that i hlawh dawn lo a nih chu; LALPA'n Sisera chu hmeichhe hnenah a hralh dawn a ni," a ti a. Tin, Debori chu a tho a, Baraka hnenah Kedes khaw lamah chuan a kal ve ta a.
10. Tin, Baraka chuan Zebulun-ho leh Naphtali-ho chu Kedes-ah a chah khawm a; mi singkhat amah nen an han kal a: tin, Debori pawh a hnenah chuan a han kal ve a.
11. Tin, Ken mi Hebera chu Ken mi Mosia puzawn Hobaba thlahte zing ata a lo awm hrang a, Kedes kianga Zaananim rama sasaw thing hmun daihah a puan in a va zar a.
12. Tin, Abinoama fapa Baraka chu Tabor tlangah a chho tih Sisera an hrilh a.
13. Tichuan Sisera chuan a tawlailir zawng zawng, thir tawlailir zakua leh a hote Jentail-te ram Haroseth khua ata. Kison luiah a khawm chiam a.
14. Chutichuan Debori chuan Baraka hnenah, 'Khai le, vawiin hi LALPA'n Sisera chu a pek ni che a ni e: I hma hruaitu chu LALPA a ni lo'm ni?" a ti a. Tichuan baraka chu Tabor tlang ata a chhuk a, mi singkhatin an zui thla a.
15. Tin, LALPA'n Sisera leh, a tawlailir zawng zawng leh, a sipaiho zawng zawngte chu khandaihin Baraka hmaah chuan a tibuai ta nuai hlawm a; tin, Sisera chu a tawlailir ata a chhuk a, a kein a tlan bo ta daih a.
16. Baraka erawh chuan tawlailirte leh sipaiho chu Jentail ram Haroseth thleng chuan a um ta a: tichuan Sisera sipaiho zawng zawngte chu khandaihin an that vek a: pakhat mah dam an awm lo.
17. Sisera erawh chu Ken mi Hebera nupui Jaeli puan inah kein a tlan lut a: hazor lal Jabina leh Ken mi Hebera chhungte chu inrem reng an ni a.
18. Tin, Jaeli chu Sisera hmuak turin a lo chhuak a, a hnenah, "Ka pu, lo lut rawh, ka hnenah lo lut rawh; hlau suh," a ti a. Tichuan puan in chhungah chuan a hnenah a lut ta a, tin, ani chuan puanin a khuh a.
19. Tin, a hnenah, "Khawngaih takin tui tlemte mi han pe teh khai, ka tui a hal em mai e," a ti a. Tin, bawnghnute um a han hawng a, a intir a, a khuh leh ta a.
20. Tin, a hnenah, "Puan in kawngkaah khan ding la, tichuan, 'Hetah hian mi an awm em? Tia an rawn zawh che chuan, 'Awm lo,' lo ti zel ang che," a ti a.
21. Chutichuan Hebera nupui Jaeli chuan puan in khenkilhna a la a, tuboh a keng a, zawitein a pan phei a, khenkilhna chuan a bekbawrah a kheng a, a kheng tlang a, leiah a bur ta ngur mai a; a chauin a mut a tui hle mai si a; tichuan a thi ta a.
22. Tin, ngai teh, Barakan Sisera a rawn um chu, va hmuah tumin Jaeli chu a va chhuak a, a hnenah, "Lo kal teh khai, i mi zawna chu ka lo entir teh ang che," a ti a. Tichuan a hnenah a va kal a; tin, ngai teh, Sisera chu a lo thi reng ma a, puan in khenkilhna chu abekbawrah alo bur ngur mai a.
23. chutichuan Pathian chu mi ni chuan Israela thlahte hmaah Kanaan ram lal Jabina chu a titlawm ta a.Tichuan Israela thlahte chua Kanaan ram lal Jabina an hmin ta deuh deuh a, Kanaan ram lal Jabina chu chhe der khawpin an lo siam ta a.
24. Tichuan Israela thlahte chua Kanaan ram lal Jabina an hmin ta deuh deuh a, Kanaan ram lal Jabina chu chhe der khawpin an lo siam ta a.
←  Judges (4/21)  →