←  Ecclesiastes (3/12)  →

---

1.

Engkim tan hian hun ruat a awm a, van hnuaia thiltih zawng zawng tan hun remchang a awm:

2.

Pian hun a awm a, thih hun a awm: phun hun a awm a, thil phun phawi hun a awm;

3.

Tihhlum hun a awm a, tihdam hun a awm; thiah hun a awm a, siam leh hun a awm;

4.

Tah hun a awm a, nuih hun a awm; sun hun a awm a, lam hun a awm.

5.

Lung paih darh hun a awm a, lung lak khawm hun a awm; pawm hun a awm a, pawm loh hun a awm;

6.

Zawn hun a awm a, tihbo hun a awm; vawn that hun a awm a, paih bo hun a awm;

7.

Tihthler hun a awm a, thui hun a awm; ngawih hun a awm a, tawng hun a awm;

8.

Hmangaih hun a awm a, huat hun a awm; indo hun a awm a, muan hun a awm a ni.

9.

Hnathawktuin a thawhrimna ata eng hlawkna nge a hmuh?

10.

Pathianin mihring fate hnena buaipui tura hna a lo pek chu ka hmu ta.

11.

Engkim hi an hun theuhvah chuan mawi takin a siam a; mihring rilruah chuan chatuan a dah bawk a;mahse, chuti pawhin anni chuan Pathianin a tir ata a tawp thlenga thil a tih chu an hmu chhuak thei chuang lo.

12.

Hlim taka awm a, an nun chhunga thil tha an tih aliama an tana tha zawk engmah ka hre lo.

13.

Tichuan, mi tin, ei leh in leh an thawhrimna zawng zawnga hlim taka an awm chu Pathian thilpek a ni.

14.

Pathianin a tih apiang chu a awm hlen ang tih ka hria: engmah belh theih a ni lo ang a, lak then theih pawh a ni hek lo ang; mihringin amah an tih theihna'n Pathianin chutiang chuan a ti a ni.

15.

Thil awm mekte hi lo awm tawh sa kha a ni a: thil lo awm turte chu lo awm tawh sa bawk kha a ni; Pathian chuan a bo tawhte kha a rawn la kir leh zel a ni.

16.

Tin, chu lo pawh chu, ni hnuaiah rorelna hmuna suahsualna awm leh dikna hmuna suahsualna awm chu ka hmu bawk a.

17.

Ka rilruah chuan, Pathianin mi fel leh mi suaksualte ro pawha rel ang; thil tinreng tan leh hna tinreng tan hun a awm si a, ka ti a.

18.

Mihring fate chung thu-ah chuan, ramsa mai an ni tih an inhriat theihna'n Pathianin anmahni a fiah a ni, ka ti rilru a.

19.

Mihring fate chunga khawvel leh ramsate chunga khawrel chu thuhmun a ni si a, khawrel thuhmun an chungah a tla a ni; pakhat a thih ang bawkin a dang pawh kha a thi a; an zain thawk dan thuhmun an ni a, mihring chu ramsa aiin a chungnung lem lo; thil zawng zawng hi engmah lo mai a lo ni si.

20.

An zain hmun khatah an kal vek a; an zain vaivuta mi an ni vek a, an zain vaivutah an chang leh vek a ni.

21.

Mihring fate thlarau chu chung lamah a chho emaw, ramsa thlarau chu hnuai lamah leiah a chhuk emaw tih tu nge hria?Chuvang chuan mihring chu a thiltihah a lawm aliama tha engmah a awm lo, tih ka hmu a ni chu chu chanvo a ni mai a: a hnua thil lo awmte hmu turin tuin nge rawn hruai kir leh hlei ang?

22.

Chuvang chuan mihring chu a thiltihah a lawm aliama tha engmah a awm lo, tih ka hmu a ni chu chu chanvo a ni mai a: a hnua thil lo awmte hmu turin tuin nge rawn hruai kir leh hlei ang?

---

←  Ecclesiastes (3/12)  →