←  2Timothy (3/4)  →

---

1.

И знај го ова: во последните денови ќе настапат тешки времиња,

2.

зашто луѓето ќе бидат себични, среброљупци, фаленичари, горделиви, пцујачи; непокорни на родителите, неблагодарни, несвети;

3.

без љубов, непомирливи, злобни клеветници, невоздржани, свирепи, непријатели на доброто,

4.

предавници, безобѕирни, надуени, повеќе сластољубиви отколку богољубиви,

5.

кои имаат изглед на побожност, а се откажале од нејзината сила; а таквите одбегнувај ги!

6.

Зашто меѓу нив има такви кои се вовлекуваат во домовите и ги мамат неразумните жени обременети со гревови, кои се водени од различни страсти,

7.

кои постојано учат, а никогаш да дојдат до познавањето на вистината.

8.

И како што Јаниј и Јамвриј му се спротивија на Мојсеј, така и овие и се противат на вистината, луѓе со изопачен ум, отфрлени во однос на верата.

9.

Но нема да напредуваат веќе, зашто нивното безумие ќе се открие пред сите, како што се откри и на оние двајца.

10.

А ти внимателно го следеше моето учење, поведението, замислата, верата, долготрпението, љубовта, истрајноста,

11.

прогонствата, страдањата што ми се случија во Антиох, во Иконија и во Листра. Какви прогонства претрпев, а Господ ме избави од сите!

12.

А и сите кои ќе живеат побожно во Христос Исус, ќе бидат прогонувани,

13.

додека злите луѓе и измамниците ќе напредуваат во злото, мамејќи и бидувајќи мамени.

14.

А ти остани во она што си го научил и во што си убеден, зашто знаеш од кого си го научил и

15.

зашто уште од детството ги познаваш Светите Писма, кои можат да ти ја дадат мудроста која води кон спасение преку верата во Христос Исус.

16.

Целото Писмо е од Бог вдахновено и е полезно за поучување, за прекорување, за поправање и за воспитување во праведност,

17.

за да биде Божјиот човек совршен и подготвен за секое добро дело.

---

←  2Timothy (3/4)  →