| ← 2Thessalonians (2/3) → |
| 1. | А сега, ве молиме, браќа, во однос на доаѓањето на нашиот Господ Исус Христос и за нашето заедничко собирање кај Него, |
| 2. | не дозволувајте брзо да се поколебате во разумноста, ниту да се исплашите од некој дух или слово, ни од некое послание, како да е од нас испратено, како веќе да настапил Господовиот Ден! |
| 3. | Никој да не ве измами на никаков начин, зашто тоа нема да се случи додека првин не дојде отпадништвото и не се појави човекот на безаконието, синот на погибелта, |
| 4. | кој се противи и се воздига над сè што се нарекува Бог или светиња, така што ќе седне во Божјиот храм и ќе се претставува себеси дека тој е Бог. |
| 5. | Не помните ли дека за ова ви зборував уште кога бев кај вас? |
| 6. | И сега знаете што го задржува за да се открие во своето време. |
| 7. | Зашто, тајната на беззаконието веќе дејствува, додека не се отстрани од средината Оној што сега ја задржува, |
| 8. | и потоа ќе се јави беззаконикот кого Господ ќе го убие со здивот на Својата уста и ќе го уништи со појавата на Своето доаѓање. |
| 9. | Тоа е оној, чие доаѓање е во согласност со сатанското дејствување, со секаква сила, со чудотворни знаци, со лажни чуда |
| 10. | и со секаква неправедна измама за оние кои загинуваат, зашто не ја примија љубовта на вистината за да се спасат. |
| 11. | И затоа Бог им праќа заблуда да дејствува меѓу нив за да и веруваат на лагата, |
| 12. | та да бидат осудени сите, кои не и поверуваа на вистината, а имаа задоволство во неправедноста. |
| 13. | А ние сме должни секогаш да Му благодариме на Бог за вас, браќа, мили на Господ, зашто Бог ве избра за спасение уште од почетокот, преку осветувањето на Духот и вера во вистината. |
| 14. | И затоа ве повика преку нашето Евангелие, за да ја добиете славата на нашиот Господ Исус Христос. |
| 15. | Затоа, браќа, стојте цврсто и држете ги преданијата што ги научивте од нас, било преку слово или преку наше послание. |
| 16. | А Самиот наш Господ Исус Христос и Бог, нашиот Татко, Кој нè засака и ни даде вечна утеха и добра надеж преку благодатта |
| 17. | нека ги утеши вашите срца и нека ве утврди во секое добро дело и слово! |
| ← 2Thessalonians (2/3) → |