←  Zechariah (4/14)  →

---

1.

Mi betu vantirko kha a hung nawk a, mi in lai not har ang elin a mi hung kei har a.

2.

" Iem i hmu a?" a ta. Kei chun, "Rangkachak sakhata siem khawnvar siena, thuom sari nei, a fong tin sipa hriek bawm le khawnvar phita nei ka hmu a

3.

. Khawnvar siena sirah oliv kung pahnih a um a, a chang tieng pakhat, a voi tieng pakhat" tiin ka don a.

4.

Mi betu vantirko kuoma chun, "Pu, hieng hi ieng am a ni leh?" ka ta.

5.

Ama chun, "Hieng hi iem a nih ti i hriet nawa maw?" a ta. Kei chun, "Pu ka hriet nawh" ka ta.

6.

Chu phing leh ama chun, "Hi hi Zerubabel kuoma LALPA thu chu a nih: 'I hratna ni loin, i thilthawtheina ni bok loin, ka Thlarau lei lemin thaw ning a tih' ti hi Iengkim LALPA thu suok a nih.

7.

Aw nang daltu tlang lien, ieng am i ni hrim leh? Zerubabel chun rawt zawl a ti che a, tempul bawl zoa a lung rem nuhnung tak an pha hunah, mipuiin, 'A va mawi ngei de! A va mawi ngei de!' tiin khek dur dur an tih.

8.

LALPA thu chu ka kuomah a hung tlung a,

9.

"Zerubabel chun hi tempul lungphum hi a kut ngeiin a lo phum tah a, ama kut ngeiin bawl zo a tih. Chu pha chun Iengkim LALPA chun nangni kuoma hin a mi tir a nih ti hung hre tang in tih.

10.

Thaw kuok in la nei naw lai khan an hmusit hlak cheu an naw? Mihaiin Zerubabel kuta inkhina dar mum a chawi an hmu pha ruok chu nasa takin hlim an tih. Chun, hieng khawnvar pasarihai hi LALPA mit aiawa ngir an na, hnuoi pumpui hi an hmu vong a nih" a ta.

11.

Chun, vantirko kuoma chun, "Khawnvar siena sir ve vea oliv kunghai hi teh, iem a na a umzie?

12.

Rangkachaka siem, hriek thlit suokna khei pahnihai bakah oliv kau pahnihai umzie khom hi teh?" tiin ka'n don a.

13.

Ama chun, "Hieng hi i hriet nawa maw?" a ta, kei chun, "Pu, ka hriet nawh" ka ta.

14.

Ama chun, "Hieng hi mi pahnih, hnuoi pumpuia LALPA rong bawl dinga hriek nalhai chu an nih" a ta.

---

←  Zechariah (4/14)  →