←  Zechariah (3/14)  →

---

1.

LALPA vantirko hmaa thiempu laltak Josua ngir le chang tienga ama khingtu Setan ngir lai chu LALPAN a mi'n hmutir bok a.

2.

LALPA chun Setan kuomah, "Setan, LALPA chun a kawk che! Jerusalem thlangtu LALPA chun a hal che! Hi mi hi meia inthoka thingthu hring kei dok ang chauh a ni naw am a ni?" a ta.

3.

Josua chu thuomhnaw top tak leh vantirko hmaa chun a ngir a.

4.

Vantirko chun a bula ngirhai kuomah, "A thuomhnaw bal kha hlippek ro" a ta. Chun, Josua kuoma chun, "En rawh, i suolna ka lak hmangpek ta che a, thuomhnaw tha takin ka'n thuomtir ta ding che a nih" a ta.

5.

Kei chun, "Lukawm fai inkawmtir ro" ka ta. LALPA vantirko ngir zing chun lukawm thar a hung inkawmtir a, silfen fai an inhaktir bok a.

6.

LALPA vantirko chun Josua kuomah mawphurna pein,

7.

"Hi hi Iengkim LALPA hril chu a nih: 'Ka lampui i hraw a, ka ti ang peia i thaw chun ka insung relbawltu ning i ta, ka rorelna hmun enkol i ta, hi taka ngirhai lai hin ngirhmun chang veng i tih.

8.

"Aw Josua, thiempu laltak, nang le i hmaa thunghai khom khan, thil tlung ding inentir lawknahai hi lo ngaithla ro: ka siehlaw, Kau chu ka hung insuo ding a nih.

9.

En ta, Josua hmaa lung ka phun saw! Saw lunga son mit pasari a um a, a chungah thil inkertir ka ta, hi rama suolna hi ni khat thilthuin la hmang vong ka tih" ti hi Iengkim LALPA thu suok a nih.

10.

Chu nia chun mi tinin mani grep buk hnuoi le theichang buk hnuoia inthung tlang dingin an tuolbawmhai seng fiel tang an tih' ti hi Iengkim LALPA thu suok a nih" tiin.

---

←  Zechariah (3/14)  →