←  Zechariah (2/14)  →

---

1.

Ka hang en a, ka hmaa chun mi pakhat, a kuta inkhina hrui chawi hi ka hmu a.

2.

"Khaw laia fe ding am i na?" tiin ka'n don a. Ama chun, "Jerusalem dung le khang lienzie hriet tuma inkhi dinga hung ka nih" a ta.

3.

Chuongchun, mi betu vantirko chu a fe a, ama hmu dingin vantirko dang a hung a.

4.

Ama chun a kuomah, "Tlan la, saw tlangval kuoma son, 'Jerusalem hi mi tam tak le ran ruol tam tak chengna ding a ni leiin huondai nei lo khawpui ning a tih.

5.

Keima ngei hin mei bangin inhuon ka ta, a sunga a ropuina chu keima hi ning ka tih, LALPA chun a tih' tiin hril rawh" a ta.

6.

LALPA chun, "Kawl kil lia thli kuo chen dapin ka sukdar tah cheua chu tu hin hung suok ta ro, hung suok ta ro, hmar rama inthokin tlan suok ro!

7.

Aw Zion nauhai, suok ro! Babulon naunu kuoma chenghai, inrel suok ro" tiin a mihai chu a hril a.

8.

A mi chawimawi hnung le nangni roktu hnamhai lai a mi tir hnung hin, Iengkim LALPA chun anni chungthu chu hieng hin a tih: 'Nangni dotu taphot chun ka mit nauleng an tawk ang a nih.

9.

Chuonghai chunga chun kut inlet ka ta, hmet nawi ka ta, anni salhai ngeiin rok let ve thung an tih. Chu pha chun Iengkim LALPA chun a mi tir a nih ti hung hre tang in tih.

10.

"Aw Zion naunu, hlimin khek rawh. Ngai ta, ka hung mek a, i kuomah ka cheng ding a nih" ti hi LALPA thu suok a nih.

11.

Chu huna chun hnam tam takin LALPA hung zui veng an ta, a mihai ni tang an ta, anni lai cheng a ta, chu pha chun Iengkim LALPA chun in kuomah a mi tir a nih ti hung hre tang in tih.

12.

Judai ram chu ram thienghlima LALPA rochung ram hung ning a ta, Jerusalem chu a khawpui dittak hung ni nawk tang a tih.

13.

LALPA hmaa chun mi tin to thiep ro, a hmun thienghlima inthokin ama thu ngeiin a hung inthok suok ta si a

---

←  Zechariah (2/14)  →