←  Zechariah (11/14)  →
1. Aw Lebanon, i kot hong rawh,I sidar thing po pohai kha,Meiin a kang fai theina dingin.
2. Aw far thinghai, tap rak rak ro,Sidar thing chu a tlu ta ie!Thing intuoi zet zuthai chu,Suksietin an um zo tah!Basan saisuohai, tap rak ro,Ramhmangpuihai an rem zo tah!
3. Berampuhai tap ri ngai ro,Hmun hringhai an rem zo ta si!Keipuihai inrum ri ngai ro,Jordan chimbuk a ram zo tah.
4. LALPA ka Pathien chun hieng hin a tih: "That dinga ruot beramhai chu enkol rawh.
5. A'n chawtuhai chun an that a, hrem an ni ngai nawh. A zortuhai chun, 'LALPA chu inpakin um raw se, ka hung hausa ta si a' an ti a. A nih, anni vengtu berampuhai ngei khomin an lunginsiet nawh.
6. Kei khomin a rama chenghai hi ka lunginsiet zing ta naw ding a nih. Mi tin el chu a tuolbawm kuta le a lal kutah ka pek suok ding a nih. A ram chu suosam an ta, an kuta inthokin san suok naw ning" ti hi LALPA thu suok a nih.
7. Chuongchun, ran ruol laia that dinga ruothai, abikin neksawra umhai chu ka enkol a. Chun, hmol pahnih ka lak a, pakhat chu "Ditsak', a dang chu 'Suikhawm' tiin ka ko a, chuong chun ran chu ka ching a.
8. Thla khat sungin beram vengtu pathumhai chu ka sukbohmang a. Ran ruol chun an mi theida a, kei khomin ran ruol chu ka nghok bok a.
9. Chun, an kuomah " Nangni vengtu ni ta naw ning. A thi dinghai chu thi hai sien, a bohmang ding chu bohmang raw hai se. A thi mahlahai chun an sa infa ton raw se" ka ta.
10. Chun, ka hmol pakhat Ditsak chu ka lak a, ka tan bong a, hnam po pohai laka ka thuthlung chu ka sut a.
11. Chu nia ka thuthlung sut hmutu, neksawra um ranhai chun LALPA thu a nih ti an hriet a.
12. Kei chun an kuomah, "Awm in tizawng a ni chun ka hlaw mi pe unla, inti naw chun nangnin kol el ro" ka ta. Chuongchun, tangkaruo cheng sawmthum an mi pek a.
13. Ka man awm tawka an sak chu LALPA chun, "Belhemtu hmunah pei rawh" tiin a mi hril a. Tangkaruo cheng sawmthum chu ka lak a, LALPA ina chun belhemtu kuomah ka pek a.
14. Chuongchun, Juda le Israel inkara inunauna chu suktan dingin ka hmol dang Suikhawm chu ka lak a, ka tan bong a.
15. Chun, LALPA chun ka kuomah, "Berampu hmangna bo hmangruo bok kha la la, a ai va aw rawh.
16. A ramah berampu dang ka sie nawk ding a na, ama chun inhmanghai chu ngaisak naw ni a, a tehai zong naw ni a, hliemhai enkol naw ni a, a hriselhai khom chawm naw ni a, a thau thau sa chu fa ram vong lem a ta, an tin kawmhai chenin thlong a tih.
17. "Berampu tlaktlai lo,Ran ruol maksantu chung chu,A va hang pik ngei de aw!A ban le a mit chang tieng,Kawlhnamin sathai sien la,A ban chu zeng thla vong sien,A mit chang tieng indel raw se."
←  Zechariah (11/14)  →