Zechariah (1/14)  →
1. Lal Daria inlala inthoka kum hnina,a thla rietna, favang laihawl lai chun Ido naupa Berekia, chu naupa Zekaria kuomah LALPA thu a hung tlung a:
2. "In thlatuhai chunga khan LALPA lung a awi naw hle a.
3. Chuleiin, hi mihai kuomah hieng hin va hril rawh: Iengkim LALPA chun hieng hin a tih: 'Ka kuom tieng hung ngha nawk unla, kei khom in kuom tieng hung nghang ka tih.
4. In thlatuhai ang khan um ve naw ro. Iengkim LALPA chun a zawlnei hmasahai hmangin an kuomah, 'In um dan suolhai nghatsan unla, in thil ching tha nawhai bansan ro' tiin a hril a, sienkhom an bengkhon naw a, an uksak bok nawh, ti hi LALPA thu suok a nih.
5. In thlatuhai kha khaw lai am an um zo ta a? An zawlneihai khom kha, kumkhuoin an dam a ni?
6. Ka siehlaw zawlneihai kuoma thucha le thuruot ka pekhai khan in thlatuhai chu a nangching tawl an naw maw? Chu zoah an sim a, 'Iengkim LALPA chun thaw a tum ang hrimin, ei um dan le ei thilthaw ang peiin ei chungah a thaw a nih' an ti a ni kha" tiin.
7. Daria inlala inthoka kum hnina, thla sawmpakhatna, ni sawmhni palina, Sebat thlaab chun Ido naupa Berekia, chu naupa Zekaria kuomah LALPA thu a hung tlung a.
8. Zana chun inlarna ka hmu a. Ka hmaa chun mi pakhat, sakor sen chunga chuong a lo um a, ruoma inhmui thing buk lai chun a ngir a. A hnung tieng chun sakor sen dam, a sen-uk dam le a var dam an um a.
9. Kei chun, "Ka lalpa, hieng hi ieng tina am an na?" tiin ka'n don a. A mi betu vantirko chun, "Ieng am an nih ti inentir ka ti che" a ta.
10. Chu phing leh inhmui buk hnuoia ngir chun, "Hienghai hi hnuoi pumpui fang suok dinga LALPA mi tirhai chu an nih" tiin a mi hril a.
11. Anni chun inhmui buk hnuoia ngir vantirko kuoma chun, "Khawvel kan fang suok ta a, hnuoi pumpui chu muong tak le inrem taka umin kan hmuh" tiin an hril a.
12. Chu phing leh vantirko chun, "Iengkim LALPA, Jerusalem le Judai rama khuohai chungah kum sawmsari zet i lung a sen ta a, ieng chen am i zangaina kut i la kei tim ding a na?" a ta.
13. Mi betu vantirko kha LALPAN zaidam tak le thlamuongum takin a don a.
14. Mi betu vantirko chun ka kuomah, "Hi thu hi puong rawh: Iengkim LALPA chun hieng hin a tih: 'Jerusalem le Zion laka hin ka thikthu a se takzet a nih.
15. Ka mihai chunga ka lungsen met sungin hnam dang haiin an lo intuortir hrep el a, chuong hnamhai, him taka inngaihai chunga chun ka lung a sen hle a nih.
16. Chuleiin, zangaina leh Jerusalem tieng kir nawk ka ta, chutaka chun ka in chu indin thar nawk ning a ta, ka'n khina hrui chu Jerusalem chungah kei zam nawk tang ka tih'c ti hi Iengkim LALPA thu suok a nih.
17. "Hi khom hi puong sa bok rawh: Iengkim LALPA chun hieng hin a tih: "Ka khawpuihai chu hmuingilin hung vul nawk an ta, LALPAN Zion tlang chu thlamuong takin inumtir nawk a ta, Jerusalem chu thlang nawk a tih" tiin.
18. Chun, ka hang en a, ka hmaa chun ki pali ka hmu a.
19. Mi betu vantirko kuoma chun, "Hienghai hi iem an na?" ka ta. Ama chun, "Hieng kihai hi Juda mihai, Israel mihai le Jerusalem mihai phin dartu dinghai chu an nih" a ta.
20. Chu zoah LALPAN thirsu pali a mi'n hmutir a.
21. Kei chun, "Hienghai hi ieng thaw dinga hung am an na?" ka ta. Ama chun, "Hieng kihai hi Judahai phin dartu an nia chu tu khom a khing ngam an um naw leiin hieng thirsuhai hi a hawl zamtu ding le Judai ram hung bei a, a mi chenghai phin dar dinga lu hung lei hnam taphothai ki chu vaw tlam dinga hung an ni hih" a ta.
      Zechariah (1/14)  →