←  Psalms (89/150)  →
1. LALPA hmangaina ropui chu,Kumkhawtluongin inpak ka ta,Suon po po lai i ringumzie,Ka bau ngeiin puong dar ka tih.
2. I hmangainan kumtluong a daih,I ringumna van ang a nghet.
3. "Ka mi thlang kuomah thu ka thlung,Ka siehlaw Davida kuomah:
4. 'I thlahai lal ni pei an ta,An suonhai khom inlal peiin,Lalna hluo pei an tih' tiin".
5. Vanvela hai khin aw LALPA,I ropuina an inpak a,Mi thienghlimhai pungkhawmnaah,I ringumzie an inpak hlak.
6. Thangvanah nangma tluk LALPA,Tu dang hrim am an um thei a?Van mihai lai khin nangma tluk,Tu dang hrim am an um thei ding?
7. Van mi thienghlim thungkhawmhai lai,Pathien hi ti a um tak a,Ama kil veltu po po lai,LALPA a mak rapum tak bok.
8. LALPA Iengkim Pathien ang hi,Mi tu dang am an um hrim a?LALPA, nang chu i ropui a,I ringumnan a'n huol vel che.
9. Tuipui hrang buon buon chunga khom,Nang chu roreltu i ni a,Tui fawn sang khom i hal re hlak.
10. Mithi ruong zal ang top elin,Nangin Rahabr i sir sop a,I ban tha hratin hmelmahai,I vai dar chum chum tawl si a.
11. Vanhai i ta, hnuoi khom i ta,Khawvel le a sunga umhai,Nangma siem vong an ni si a.
12. Sim le hmar khom i siem an na,Tabor le Harmon tlang khomin,Nangma chawimawina hla an sak.
13. I ban tha a hrat em em a,I voi tieng tha a hrat hle a,I chang tieng tha a hrat nawkzuol.
14. Indikna le rorelna fel,I lalthungpha lungphum an na;Hmangaina le ringumna chu,I hmatawnga i hmang an nih.
15. LALPA, nangma chawimawi nachang,Hretuhai chu an ham a tha,I hmel enga leng hlaktu chu.
16. I hming lawmin an hlim ni tin,I felna chungah an lawm hlak.
17. An ropuina-hratna i na,I ditsakna an dong leiin,Kan ki khom a mawi a ni hi!
18. Kan phaw hi LALPA ta a na,Kan lal khom Israel Mi ThienghlimTa ngei el chu a lo ni si.
19. I mi ringumhai chu zelin,Kha hma khan thu i lo hril a: "Pasaltha chu hratnan ka'n thuom,Nelvai laia ka thlang suok bik,Tlangval ngei chu ka chawi sang tah.
20. Ka siehlaw David ka hmu suok,Ka hriek thienghlim chu ka nal a;
21. Ka hratnan inthuom zing ka ta,Ka kutin sukhrat zing ka tih.
22. Hmelma hnuoiah kun naw ni a,Mi suolhan neksawr bok naw nih.
23. A hmelmahai hnepek ka ta,A hmaah vaw thlu tawl ka tih.
24. Ka ngilneina le ringumna,A kuoma chun um zing a ta,Ka hming leiin a ki khom chu,Chawi sangin la um pei a tih.
25. Tuipui chungah thu nei a ta,Vadungpui chen inlal a tih.s
26. Ama chun, 'Ka Pa, ka Pathien,Ka Lungpui le ka SandamtuI nih' tiin mi ko a tih.
27. Ka nau lutirah siem ka ta,Hnuoia lal po pohai lai hin,Chawimawi hlaw tak la ning a tih.
28. Ama chu hmangai zing ka ta,Ka thuthlung hi inkhel naw nih.
29. A thlahai inlal pei an ta,Vanhai um sung chun a ramin,Kin ni hrim hrim nei ngai naw nih.
30. "A nauhan ka Dan hi hnawl a,Ka thu suokhai an zawm naw a,
31. Ka thupekhai an ngainep a,Ka dan pekhai an zawm naw chun,
32. An suolna leiin hrem ka ta,An bawsietna leia hrikin,Vuokna hmolin hlap tawl ka tih.
33. Sienkhom ka hmangaina ruok chu,A lakah la kir ngai nawng ka ta,Ka ringumna kei kir naw ning.
34. Ka thuthlung sut ngai nawng ka ta,Ka bau suok inphat ngai naw ning.
35. Davida hlem ngai naw ningah'Tiin ka hming thienghlim salin,A tawp chen dingin ka'n tiem a:
36. A thlahai mang ngai naw ni a,A lalna nisa ang tloin,Ka hmaa hin nghet zing a tih.
37. Chung sorthla khi a um sung chun,A ram a kin ngai naw dingzie,Hrepuitu dik ni zing a tih.
38. Sienkhom, i hriek nal chu hnawlin,A chungah i lung a sen a.
39. I siehlaw kuoma i thuthlung,Sutin a lallukhum khum chu,Hnuoiah i pei hawnpek si a.
40. A kul banghai i thiekpek a,A kulbinghai i sukchim vong.
41. A hung taphotin an rok a,An sevel ramhai nuizatbur,A lo inchang el ta si hi.
42. Dotuhai kut i sukhrat a,Hmelma lawmsa an inchang tah.
43. A kawlhnam i sukmawlpek a,Indonaah i san ta nawh.
44. A ropuina chu lapekin,A lalthungpha khom hnuoi charah,Nangin i pei thalpek der a.
45. A tlangval sung khom kei tawiin,Inzakna puon i'n siltir si.
46. Ieng chen rau am ie aw LALPA,I hmel i mi thuppek ding chu?I lungsen hi meichok angin,Ieng chen am a'n hlap ding a na?
47. Ka nun tawizie mi dawnpek rawh.Tep lo mei meia mihriemhai,I mi hang siem el hi chu aw!
48. Mihriem pieng tah a tu hrim am,Thi lo ding an um ta hlak a?Tu am Seol pumpel thei ding?
49. LALPA, i hmangaina hmasak,David kuoma ringum ding a,I'n tiemna kha iem an ta le?
50. I siehlaw an nuisaw dan hi,Hung theinghil lul naw rawh LALPA,Hnam danghai endong le hmusit,Ka tuor inrim dan po po khom.
51. I hriek nal hi hmelmahaiin,A fena photah aw LALPA,Hmusitin an cheksol a nih.
52. LALPA kuomah kumkhawtluongin,Inpakna chu um zing raw se.Amen, Amen.
←  Psalms (89/150)  →