←  Psalms (145/150)  →

---

1.

Chawimawi ka che, ka Lal Pathien,Kumkhuon i hming inpak ka tih.

2.

Ni tinin inpak ka ti che,Kumkhuon i hming chawimawi ka tih.

3.

LALPA chu a ropui em a, Inpak chungchuong ding hrim a nih,A ropuizie sui phak an nawh.

4.

Thang tinin i thilthawhai chu,Ruoltharhai hril sawng pei an ta,I thaw ropuizie puong an tih.

5.

I mawi ropuizie hril an ta,Keikhom i thilthaw makziehai,Sutin dawnkhawl ve hlak ka tih.

6.

I thaw ropui le rapumzie,Mihaiin puong dar tawl an ta,I ropuizie hril veng ka tih.

7.

Thatna i hauzie chu lawmin,Hlim takin tlang lampui an ta,I'n dikzie hi khekpui an tih.

8.

LALPA chu lainatna hau tak,Mi ngilnei le lung inuoi tak,Hmangaina tawp lo nei a nih.

9.

Mi tin chungah LALPA a tha,A thilsiem po po hai khom hi,An rengin a lunginsiet vong.

10.

Aw LALPA i thilsiemhaiin,Lawmthu hrilin, inpak an che,I mi thienghlim po po khomin,Inpakin chawimawi an ti che!

11.

I lalram ropuizie hrilin,I thilthawtheizie puong an tih.

12.

I thilthaw ropuiziehai chu,Mihai kuomah puong dar an ta,I ram ropuizie hril an tih.

13.

I ram chu kumhlun ram a na,I lalram khomin suon tin a daih.A thutiemah LALPA a ringum,A thilsiem chungah ngil a nei.

14.

Tluhai chu LALPAN a tungding,Indom kunhai chu a kei har.

15.

Nangma thlirtuhai po po chu,A hun takah fak ding i pek.

16.

I kut phara i hang hrai chun,Hring tinrenghai an tlai seng hlak.

17.

Kong iengkimah LALPA a'n dik,A thaw taphotah ngil a nei.

18.

Ama kotu taphot kuomah,LALPA chu a hnai zing hlak a,Titakzeta kotu kuomah.

19.

Ama tituhai ditzawng chu,A sukhlawtlingpek ngei hlak a,An rawl hrein a san him hlak.

20.

Ama hmangaituhai po chu,LALPAN a veng him tlat hlak a,Mi suolhai chu sukbo a tih.

21.

LALPA inpakna thuhai chu,Ka bauin puong suok hlak a ta,Thilsiem tinin a hming thienghlim,Kumkhuoin inpak raw hai se.

---

←  Psalms (145/150)  →