←  Psalms (102/150)  →
1. LALPA, ka tongtai ngaithla la,Ka hnina'n i kuom tlung raw se.
2. Beidong taka ka um lai hin,Ka lakah i hmel thup naw rawh.Keima tieng i na hung daw la,Ka koin mi hung don nghal rawh.
3. Ka dam sung nihai hi damten,Meikhu ang an inzam ral a,Thuka thingthu hring kang angin,Ka ru le changhai an inut.
4. Hlobet sir hmat vuoi hnung angin,Ka lung a koi inhmat vong a,Fak le dawn ka zong pei tah nawh.
5. Ka beidong inrumna leiin,A ru khat chauh ka lo ni tah.
6. Thlaler tuivalongy ang ka na,Khaw ram simbuk ang el ka nih.
7. In chung sipa chongzong fu falAngin ka ngha vel lep lep a.
8. Hmelma'n ni tin mi deusawin,Ka hming inriem khumnan an hmang.
9. Bu-a ka ring chu vut a na,Ka dawn khom mitthli pol a nih.
10. I lungsen so insang leiin,Khai dokin sirah i mi hnawl.
11. Ka hringnun hi zan tieng hlim thla,Ral nawk el hlak ang hi a na,Hlo hna angin ka vuoi zo tah.
12. Nang chu LALPA, chatuon chenin,Lalthungphaah in thung leiin,Ruolthar hung pei dinghai lai khom,I hming re ngai hrim hrim naw nih.
13. Thoin Zion lunginsiet la,Ditsak hun a ni takzet a,Hun bituk khom a tlung ta hi.
14. I siehlawhan a lung bang chen,An ngainain an lungdum a;A pilvut chen an lunginsiet.
15. Hnamhan LALPA hming ti sien la,Hnuoia lalhai po po khomin,A ropuina chu ti raw se.
16. LALPAN Zion tungding a ta,Ropuina leh inlang a tih.
17. Vakvaihai tongtaina LALPAN, Donin ngaisakpek tang a ta,An thil hni lo hmusit naw nih.
18. Thang la hung thar peihai ta di'n,Hieng thuhai hi inchik tha la,Suon la hung pieng pei dinghaiin,LALPA an inpak theina din.
19. A hmun insang van a'nthokin LALPAN hnuoi a zuk thlir hlak a,
20. Tanghai inrum ri ngaithlain,Thi dinga ruothai a san suok.
21. Chuongchun mihan LALPA hming chu, Zionah hril dar tang an ta,Jerusalem khawzawla chun,A hming hung chawimawi bok an ta,
22. Ram tina mi hung pung khawmin,LALPA chu hung chawibiek an tih.
23. Ka vanglai tha sukkulchoin,Ka nihai khom a suktawi a.
24. Chuongchun, hieng ang hin ka ti a:Aw ka Pathien, ka vanglai hin,Mi la hmang ve naw hram raw khai;I kum chun thang tin a dai si.
25. A tirin hnuoi thut i phum a,Vanhai khom i kutsuok an nih.
26. Sienkhom la thamral vong an ta,Nang ruok chu um kumkhuong i ta;Puon angin la chul vong an ta,Silfen angin la hnawl i ta,An rengin la bohmang an tih.
27. Nang ruok chu i pangngai zing a,I kumin kin ni nei naw nih.
28. Kan thlahai chu i angsungah,Him takin cheng muong tang an ta,An suonhai khom i angsungah,Siem nghetin hung um pei an tih.
←  Psalms (102/150)  →