←  Proverbs (6/31)  →
1. Thu intiemkamI tuolbawm aia tuor intiem a,Hmelhriet lo leiba rulpek dinga,Dakhama i lo insiem a ni chun,
2. I bau ngeiin i lo inhril awk a,I thu suoka i lo inkhit a ni chun,
3. I tuolbawm kutah i awk hrein,I hung intal suok theina dingin,Ka naupa, hieng hin thaw rawh:Fe la, a kuomah inphahnuoi la,I thu i sut phalpek hram dingin,I tuolbawm chu thlut ngat ngat rawh.
4. I mit insim hrim hrim naw la,I mit vun insintir naw rawh.
5. Sapeltu hmaa sakhi a tlan suok ang le,Vate vetu laka vate a vuong suok angin,Nang khom intal suok ngei ngei rawh.
6. Nang thabo, phaivang kuomah fe la,An um danhai ngaituo la, var rawh.
7. Lal le hotu an nei naw a,Roreltu khom an nei bok nawh.
8. Nipuiah fak ding an zong khawm a,Busik hunah bu an sek khawm hlak.
9. Mi thabo, ieng chen am i zal ding?I zal chu ieng tik a'm i tho ding?
10. La hang zal met ka tih, La hang inhnar met ka tih,Kut hmasuiin, hadam takin,La'n zam met ka tih' i ti sung khan,
11. Pasietna chun rukru angin,Hung nang thut a ti che a,Tlaksamna khomin ral angin,Hung nangching thut a ti che.
12. Mi hmangna bo le khawlo chun,Thu vuongva a'n virpui a,
13. A mitin mi a siei khum a,A kein mi a zaizir a. A kut chalin a khik kuol a.
14. A lungril a lutinle a,Suol thaw ding ringot a phan a,Innghirnghona a chok suok hlak.
15. Sietnain hung nang thut a ta,Siem that ruol lo sietnain,Thawk le khatah nang rup a tih.
16. Thil paruk LALPAN a theida a,Thil pasari a ten em em bok:
17. Mit chapohai, khel hril hmang hai,Poi tawk lo mi that ching hai,
18. Suol thaw ding phierruk ching hai,Suol thaw dinga ngal hrat hai,
19. Hrepuitu der, khel hril he hai,Unau kara innghirnghona tutu hai.
20. Ka naupa, i pa thupekhai zawm la,I nu zirtirna che nghatsan naw rawh.
21. I lungrilah vong kumkhuo la,I ringah zem tlat hlak rawh.
22. I kalchawinaah thuoi a ti che a,I in changin veng a ti che a,I har pha leh inbiekpui a ti che.
23. Hieng thupekhai hi khawnvar a na,Hi zirtirna hi var a nih.Inthunun dinga inzilna hi,Hringna lampui a nih.
24. Nuhmei khawlohai lakah leNu suol kam thlum lakah veng a ti che.
25. A pangti mawina inhnar naw la,A mitin kuoi thlu naw raw se che.
26. Beiin nawchizor a'n chawk thei a,Uirenu ruok chun i hringna a pel a nih.
27. Zakuo kang loin meiling,Tuin am a pom thei a?
28. Ke kang loin meiling chungah,Mi a lawn thei hlak am a ni?
29. Mi nuhmeihai suolpuitu chu,Chuong ang char chu a ni a,Hrem loin suok ngai naw nih.
30. Tam leia thil inrutu chun,Endong a hlaw ngai naw a,
31. Man suok a ni pha ruok chu,A let sariin rul a tih,A nei po hu khom lo ni sien.
32. Mi nuhmei uirepuitu chu,Hrietna tlasam mi a na,A nun a suksiet a nih.
33. Hliem le hming siet tuor a ta,Dam sungin muolpho a ta;
34. Thiknan a pasal lung sukling a ta,Phuba a lak pha leh za ngai naw nih.
35. Suma intlak nuom naw ni a,Ieng zat pek khomin lungawi naw nih.
←  Proverbs (6/31)  →