←  Proverbs (28/31)  →
1. Mi suol chu tu hnot loin a tlansie a,Mi fel chu sakeibaknei angin a huoi.
2. Ram sungah helna a suok pha, Roreltu an inthlak zur zut hlak a;Lal var le hrietna hau mi ruok chun,Buoina um loin ram a enkol hlak.
3. Pasiehai neksawr mi roreltu chu,Bu pha setu ruopui vanawn ang a nih.
4. Dan bawsetuhan mi rilohai an inpak a,Dan zawmtuhai ruok chun an dodal hlak.
5. Mi suolhan rorelna dik an hriet thiem naw a,LALPA zongtuhai chun iengkim an hriet thiem.
6. Nun khawkher hrawtu mi hausa ni nekin,Soisel boa kalchawitu mi rethei ni a tha lem.
7. Dan zawmtu nau chu lungvar nei mi a na,Mi hnukrawlhai pawltu chu a pa sukzaktu a nih.
8. Sum pung la teua insukhausatu chun,Mi rethei lainatuhai ta dingin a khawl khawm a nih.
9. Tu khom dan bengkhon nawtu chu,An tongtainahai chen khom a tirdakum.
10. Lampui tha loa mi indikhai thuoitu chu,Ama tlakkhur choa ngei chun tlang a ta,Soisel boa khawsatu ruok chunThil tha dongin rochung a tih.
11. Mi hausa chun var a'n ti hle khom a ni thei a,Lungvar nei mi rethei chun a hmu tlang vong si.
12. Mi fel a hlawtling chun hlimna nasa tak a um a,Mi rilo a dingchang pha mi an inbi hmang hlak.
13. Mani suolna iptu chu hmuingil naw ni a,Inpuonga simtu chun zangaina hmung a tih.
14. LALPA ti roptu chu a hamtha,Mi lulul ruok chu a vangduoi hlak.
15. Roreltu suol chu mi retheihai ta dingin,Keipui inrum le savom mi hnot ang a nih.
16. Hrietthiemna tlasam lal chun,Rawng takin mi a neksawr hlak;Hleprukna theidatu lal ruok chu,A dam sung nihai sukseiin um a tih.
17. Tuolthattu chu tuoltlan sien khom,Tu khomin hum naw hai sien la,A thi chenin tlan se zing raw se.
18. Soisel boa kalchawitu chu him a ta,Nun khawkher hrawtu ruok chu tlu thut a tih.
19. Mani lo inlettu chun bu hau a ta,Duthusam ringot hnottu chu pasieng a tih.
20. Mi ringum chun malsawmna dong rawn a ta,Hausak thut tumtu chu hrem loin suok naw nih.
21. Thlei bik nei hi a tha nawh-Bei hlek chunga khom thaw suol thei a nih.
22. Mi tiksie chun hausak vat a chak a,Pasietnan a nghak zing ti a hriet si nawh.
23. Mi ziltu chun mi inpak dertu nekinA tawpah mi ngainat hlaw lem a tih.
24. Mani nu le pahai rok a,"Ieng khom a suolna a um nawh" titu chu,Suomhmang ruol tha a nih.
25. Mi duam chun innghirnghona a chok suok a,LALPA-a innghattu ruok chu hmuingil a tih.
26. Mani lungrila innghattu chu mi invet a na,Varnaa kalchawitu ruok chu a him hlak.
27. Pasiehai somdawltu chu tlasam ngai naw ni a,Mit insimsantu ruok chun tongsie phur teu a tih.
28. Mi rilo an dingchang pha mihai an inbi a,Mi rilo an ram pha leh mi fel an pung hlak.
←  Proverbs (28/31)  →