←  Proverbs (24/31)  →
1. Mi rilohai inhnar naw la,Anni lai thang ve chak bok naw rawh;
2. Inpawngnekna ding ngot an dap a,Poi tawk dan ding ngot an hril hlak.
3. Varna hmanga sungkuo chu indin a na,Inhrietthiem tonnaa suknghet a nih.
4. In sung chu ro hlu le mawi tinrenga,Hrietna hmanga sung sip a nih.
5. Pasaltha var chun mi hrat khawkheng nekin,Nasa takin thil a thaw thei lem a,Hrietna hi awmkhau nekin a tha lem.
6. Ral do dingin ral rel thiem a ngai a,Remhre hauhai chun hmelma an hne hlak.
7. Kul kota mipui pungkhawmnaaThupui vai phak lo mi invethai ta dingin,Varna hi ban phak ruol a ni nawh.
8. Thil tha lo thaw ding phier hlaktu chu,Mihaiin mi khel siet hmangah an ngai.
9. Thil tha lo phier hi suol a na,Hmusittu chun mi hnam a kai.
10. Buoi mangang huna i chau tlep el chun,Hratna i nei tlawm hle a nih.
11. Indik lo taka thi dinga an thuoihai chu san lo a,That dinga an fen dawr dawrhai chu ensan a,
12. "Kan lo hriet ve reng reng lem ie!"Tia inhril tlip in tum tal dam a ni chun,Lungril buktu'n a hmu naw ding cheu maw?In thlarau vengtu chun a hriet kim vong a,Mi tin an thil thaw angin a rul ding a nih.
13. Ka naupa, khuoizu dawn rawh, a tha si a,A thlara inthoka far ngei chu inhnik i ti kha.
14. Varna hi i hringnun khuoizu a nih ti hre la,I man fuk chun hma tieng beisei ding nei i ta,I beiseina chu thlawn ngai hrim hrim naw nih.
15. Suomhmang angin mi fel in inchan naw la,A chengna in chu rok ngai naw rawh,
16. Mi fel chu voi sari tlu sienkhom,A hung tho nawk pei hlak a,Mi rilohai ruok chu sietnain a chim nel hlak.
17. I hmelma a tlukin diriem naw la,A'n sui changin i lungril lawm naw raw se.
18. LALPAN hmuin dit nawng a ta,A chunga a lungsenna re hlau rawi a tih.
19. Thil suol thawtuhai leiin insukhnur nuom naw la,Mi rilohai chu inhnar ngai bok naw rawh
20. Mi suol chun beisei ding hrim a nei naw a,Mi rilo khawnvar chu sukmit vak ning a tih.
21. Ka naupa, LALPA le lal chu ti la,Anni laka helhai chu inkoppui naw rawh;
22. An chungah sietna intlungtir thut an tih,Sietna intlun theitu an ni ve ve si a.
23. Mi var chun hienghai khom hi a hril:Rorelnaa thlei bik nei hi a tha nawh.
24. Mi rilo kuomah, "Poi i tawk nawh" titu chu,Miin tongsie inphur an ta,Hnam tinin tirdak an tih.
25. Thiem naw inchangtirtu ruok chu lawm an ta,Malsawmna tam tak vurin um bok a tih.
26. Donna indik tak pek chu,Hmura infawp ang a nih.
27. Puo tienga i sin chu thaw zo la,I lohma iengkim rel fel diem la,Chu zoah i in ding indin rawh.
28. A san boin i tuolbawmhai thubuoiah, A kal zawngin hrepuituah thang ngai naw la,Khel hrilnan i hmur hmang naw rawh.
29. "Aman ka chunga a thaw ang charin,Hang thungrul veng ka tih" ti ngai naw rawh.
30. Mi thabo lo ka hraw tlang a,Rem hre lo grep huon ka sir bok a,
31. Hmun tin hlingin a bawm sip a,A hnuoi thulin a tuom phui vong a,A dai lung bang a chim thla vong.
32. Ka thil hmu ka ngaituo neu neu chun,Inchuk ding thil ka hmu suok a:
33. La hang zal met ka tih, La hang inhnar met ka tih,Kut hmasuiin, hadam takin,La'n zam met ka tih' i ti sung khan,
34. Pasietna chun rukru angin,Hung nang thut a ti che a,Tlaksamna khomin ral angin,Hung nangching thut a ti che.
←  Proverbs (24/31)  →