←  Proverbs (20/31)  →

---

1.

Uoiin hi nuizatbura mi siemtu a na,Zu hrat chu insuol khekna siemtu a na,Zu dawi veta um chu a varthlak nawh.

2.

Lal lungsen chu keipui inhuk ang a na,A suklungsentu chun hringna a chan hlak.

3.

Innghirnghona laka fihlim hi inzaum nina a na,Mi invethai ruok chu an inrol phet hlak.

4.

Mi thabo chun a hunah hnuoi a'n let pei naw a,Busik hunah sik ding a hmu ngai bok nawh.

5.

Lungrila mihriem tumhai chu li angin a'n thuk a,Sienkhom mi var chun a man suok vong thei.

6.

Mi tam tak ringumin an insal hlak a,Mi ring tlak tak tak chu tuin am hmu zo a ta?

7.

Indiknaa kalchawi hlak mi fel chu,A hnung zuitu a thlahai an hamtha.

8.

Ro rel dinga lal a'n thung pha chun,A mitin thil tha naw po po a sep fai hlak.

9.

"Ka lungril ka vong thienghlim a,Suol lakah ka fai" tu am ti thei?

10.

Bukna indik lo le inkhina indik lo chu,Pathienin a theida ve ve a nih.

11.

Naupang khom a changchavoiah,Mi tha le indik a nizie a'n lang vong.

12.

Hriet theina na le hmu theina mit hai hi,LALPA siem vong a nih.

13.

Imu i thlakhla chun rethei i ta,I har zing chun fak seng lo nei i tih.

14.

Inchawtuin, "A tha nawh, a tha nawh" a ta,A fe pha a thil inchawk chu a suong vieu si hlak.

15.

Rangkachak dam, lunghlu rubi dam a tam,Hrietna thu hrilna hmur ruok chu lunghlu vang a nih.

16.

Hnam dang ta dinga dakhama insietu silfen chu la la,Nuhmei tha lo ta ding a ni lem chun a silfen chu dakhamah sie rawh.

17.

Thil fak ruk chu inhnik hle khom ni sien,A tawpah baua lung thil hnaw sip ang a nih.

18.

Mi berawnin thil ruohmang hlak la,Var taka ral rel hmasa zetin bei hlak rawh.

19.

Mi bau tam chun thuruk a ip thei naw a,Chuleiin, mi bau tam chu pawl naw rawh.

20.

Tu khom nu le pa tongsie inphurtu chu,Thim sa lai tak a khawnvar sukmitin um a tih.

21.

Olsam taka rosum hau thut mihai chu,A tawp tieng hmuingil naw ni hai.

22.

"Ka poi i tawk, thungrul ka ti che"Ti ngai hrim hrim naw ro,LALPA nghak unla, hung san suok a ti cheu.

23.

Bukna indik lo hi LALPAN a theida a,Inkhina indik lo chu a tha bok nawh.

24.

Ei kalchawi tin hi LALPA ruot a na,Tuin am a lampui ding hre thei a ta?

25.

Thu intiem thuta a hnunga ngaituo chauh hi,Mani le mani insukkolawkna a ni hlak.

26.

Lal var chun mi rilohai a zap leng a,Tawlailirin a chil tawl hlak.

27.

Mihriem lungril elvartu chu LALPA a na,A sungril inthuk tak chenin a en suok hlak.

28.

Hmangaina le ringumnain lal a vong him a,A lalthungpha chu hmangainaa suknghet a nih.

29.

Tlangvalhai ropuina chu an hratna hi a na,Upahai mawina chu an lu intuok hi a nih.

30.

Hliem khopa invuokin thil tha lo a sukfai a,Vuokna chun sungril chen khom a tleng fai hlak.

---

←  Proverbs (20/31)  →