| ← Proverbs (16/31) → |
| 1. | Mihriem lungrilin thil a riruong a,Sukpuitlingtu ruok chu LALPA a nih. |
| 2. | Mihriem chun a lampui indikin a hriet hlak a,Sienkhom, lungril inkhitu chu LALPA a nih. |
| 3. | I thilthaw iengkim chu LALPA inkoltir la,I thil tumhai chu hung hlawtling a tih. |
| 4. | LALPAN iengkim hi san neia a siem a na,Mi rilohai khom hi sietna nia ding an nih. |
| 5. | Lungril chapohai chu LALPAN a tirdak a,Hremna pumpel naw top an tih ti hre chieng rawh. |
| 6. | Hmangaina le ringumnain bawsietna a tleng fai a,LALPA tina leiin miin suol a pumpel hlak. |
| 7. | A um dana LALPA suklawmtu chun,A hmelmahai khom inrem takin a umpui thei. |
| 8. | Fel lo taka sum tam tak nei nek chun,Fel taka tlawmte nei a tha lem. |
| 9. | Mihriemin a lampui ding a duong hlak a,A kalchawi thuoitu ruok chu LALPA a nih. |
| 10. | Chung tieng thu anga ro rel hlaktu lal chun,A kam suokin ro rel suol ngai naw nih. |
| 11. | Bukna le inkhina indik chu LALPA ta a na,Ip rikna po po khom ama siem vong a nih. |
| 12. | Thil suol thaw hi lalhan an tirdak a,Indikna lei chauhin an lalna a nghet a nih. |
| 13. | Lalhan thu indik hril hi an lawm a,Thu dik hril mi chu an hlutsak hlak. |
| 14. | Lal lungsen chu thina zuolko a na,Mi var chun a lo thlem lungawi thei. |
| 15. | Lal hmel a hlim chu nun a sukhoi a,A ditsakna chu thal sum tui pai ang a nih. |
| 16. | Varna hi rangkachak nekin a tha lem a,Hrietna hi tangkaruo nekin a hlu lem. |
| 17. | Mi indik lampui chu suol leh an inpaw naw a,Fimkhur taka kalchawitu chun a nun a hum hlak. |
| 18. | Chapona chu sietnain a zui a,Lungril induna chu tluknain a zui. |
| 19. | Mi chapo le ral lak sum insem nek chun,Inngaitlawm taka pasiehai laia khawsak a tha lem. |
| 20. | Zirtirna thu poisatu chu a hmuingil hlak a,LALPA-a innghattu chu a hamtha hlak. |
| 21. | Lungvar nei chu sungril mit varna nei mi an na,Tongkam thlum chun mi hne theina a sukpung. |
| 22. | Varna nei hi hringna tui hnar a na,Invetna hi mi invethai hremna a nih. |
| 23. | Mi var lungril chun a bau chang a thuoi a,A thu hril khom a awium bik hlak. |
| 24. | Tongkam thlum chu a thlara khuoizu ang a na,Lungril a sukhlim a, ru le chang a sukhrisel. |
| 25. | Mihriem ngaia lampui indik nia inlang,A tawpah thina intlun lem hlak si a um. |
| 26. | Sinthawtu chu a phing khopna dingin a'n rim a,A phingtamna chun sin a'n thawtir a nih. |
| 27. | Mi rilo chun suol thaw ding a phier hlak a,A kam suok chu meichok inhlap ang a nih. |
| 28. | Mi kawi chun innghirnghona a chok suok a,A kawi zawnga thu kher mi chun ruol bul khom a sukthe hlak. |
| 29. | Tharum thaw mi chun tuolbawmhai a sukhmu a,Lampui tha loah a thuoi tawl hlak. |
| 30. | Mi mitsir ching chun thil suol a phan hlak a,Hner pet ching chun suol tieng a awn hlak. |
| 31. | Lu tuok hi ropuina lallukhum ang a na,Fel taka kalchawihai dong hlak chu a nih. |
| 32. | Mi ralhrang nekin mi zaidawthei ni a tha lem a,Khawpui latu nekin lungsen kei dei thei mi ni a tha lem. |
| 33. | Mal chungah thum ei vawr hlak a,Thu tawpna ruok chu LALPA a'n thok vong a nih. |
| ← Proverbs (16/31) → |