| ← Proverbs (15/31) → |
| 1. | Donna innem chun lungsen a thawi dam a,Invin ruok chun lungsen a chok tho. |
| 2. | Mi var bau chun varna thu a hril hlak a,Mi invet lei chun thu invet a per suok hlak. |
| 3. | LALPA mit chu hmun tinah a fu a,Mi rilo le mi tha khom a enthlak zing. |
| 4. | Bau innem chu hringna thing a na,Lei lutinle chun lungril a sukngui. |
| 5. | Mi invet chun nu le pa keithuoina a ngainep a,Mi var ruok chun an zirtirna chu a poisa hlak. |
| 6. | Mi fel inah rosum tam tak a um a,Mi rilo sum lam chun buoina a'n tlun hlak. |
| 7. | Mi var hmur chun hrietna a the dar hlak a,Mi invet chun thaw vena lungril a nei nawh. |
| 8. | Mi rilo inthawina chu LALPAN a tirdak a,Mi tha tongtaina chu a lawmzawng a nih. |
| 9. | Mi rilo lampui chu LALPAN a tirdak a,Felna lampui hrawtu chu a ngaina hlak. |
| 10. | Lam indik petsantu chu na taka thunun a ni hlak a,Zilhauna theidatu chu a bohmang hlak. |
| 11. | Seol le Abadon hre tlangtu LALPA chun,Mihriem lungril lem chu a hriet chieng awm de aw! |
| 12. | Hmusittu chun zilhauna a ngai thei naw a,Mi varhai khom a biekrawn ngai nawh. |
| 13. | Lungril hlimin hmel hlim a siem a,Lungril nain thlarau a sukngui. |
| 14. | Sungril mit varna neitu chun hrietna a zong a,Mi invet ruok chun khel ringot buin a ring hlak. |
| 15. | Rethei nun chu a rimsikthlak a,Lungril hlim ruok chun ruoi a the zing a nih. |
| 16. | Hausa hnura buoina nei nek chun,Tlawmte neia LALPA ti a tha lem. |
| 17. | Intheida puma bawng tuoi thau sa fak nekin,Inhmangai taka thlai hna ring a tha lem. |
| 18. | Mi lungromin inhalna a chok suok a,Mi lunguoiin inhalna a sukre hlak. |
| 19. | Mi thabo lampui chu hlingin a bawm a,Mi indik lampui ruok chu a tluong zal. |
| 20. | Nau var chun a pa a suklawm a,Nau invet ruok chun a nu a hmusit hlak. |
| 21. | Hrietna tlasam chun a'n vetna a hlimpui a,Hrietna neitu ruok chun lam ngil a hraw hlak. |
| 22. | Remruot lawk loa thil thaw chu a tlol nuom a,Rem hrie an tam ruok chun a hlawtling hlak. |
| 23. | Donna indik pek hi tu khomin an lawm a,A hun taka dong hi a va hang lawmum de! |
| 24. | Mi var chun Seol a zuk fin nawna dingin,Chung tieng a pan tung ngat ngat hlak. |
| 25. | LALPAN mi chapo in chu a nam thluk a,Hmeithai chengna ramri ruok chu a humpek. |
| 26. | Mi rilo ngaituona chu LALPAN a tirdak a,Mi thienghlimhai ngaituona chun a suklawm. |
| 27. | Hlepnaa hnukrawl chu sungkuo buoina a na,Thamna theida ruok chu sungkuo hringna a nih. |
| 28. | Mi fel chun thu don dan ding a buktuo a,Mi invet ruok chun thu tha lo a sak suok hlak. |
| 29. | LALPA chu mi rilo hnaiah a um ngai naw a,Mi fel tongtaina ruok chu a ngaithlak hlak. |
| 30. | Hmel hlimin mi a suklawm a,Thu lawmumin ru le chang a sukhrisel. |
| 31. | Nun siem tha thei zilna ngaithlatu chu,Mi varhai lai cheng veng a tih. |
| 32. | Inthununna ngaithatu chun ama a'n ngainep a,Zilna poisatu chun hrietthiemna a chang hlak. |
| 33. | LALPA ti chu var inchukna a na,Inngaitlawm chu chawimawi hlawna a nih. |
| ← Proverbs (15/31) → |