←  Proverbs (14/31)  →
1. Nuhmei var chun sungkuo a tungding a,Nu invet chun a kut ngeiin a thiek hlak.
2. Indik taka kalchawitu chun LALPA a ti a, Ritlona lampui hrawtu ruok chun a hmusit hlak.
3. Mi invet chun vuok tuorna ding a hril suok a,Mi var ruok chun a himna ding a hril lem hlak.
4. Bawngchal um nawnaa chun bu in a ruok a,Bawngchal thain bu sik ding a thaw suok teu hlak.
5. Hrepuitu ringum chun khel a hril ngai naw a,Hrepuitu der ruok chun khel a phuokfawm hlak.
6. Hmusittu chun varna a zong a, a hmu naw a,Lungril mit varna neitu ta din hmu a olsam hle si.
7. Mi invet lakah inthier fihlim rawh,A hmura inthokin varna thu dong naw ti nih.
8. Mi varhai chun an fena ding lam an hriet a,Mi invethai invet chil ruok chu mani inhlem a nih.
9. Mi invethan suol nghatsantuhai an hmusit a,Mi varhai ruok chun an lawmpui lem hlak.
10. Mani chauhin ei lungngaina ei hriet a,Ei lawmna khom mi dangin an mi'n tawmpui thei nawh.
11. Mi rilo sungkuo chu suksietin um a ta,Mi indik sungkuo ruok chu hmuingil a tih.
12. Mihriemin lam indik nia a ngai a um a,Sienkhom thina lampui a lo ni zing thei.
13. Innui lai khomin lung a na thei a,Hlimna khom lungngainan a tawp thei.
14. Mi suol chun a suol man intel a ta,Mi tha chun a thaw that man hmung a tih.
15. Mi mawl chun mi hril taphot a awi hlak a,Mi var chun a kal pen tin a bi chieng hlak.
16. Mi var chu a fimkhur a, suol a hnawl a,Mi invet chu a'n sukhuoi a, a che rok rok hlak.
17. Lung inrom chun thil invetthlak a thaw hlak a,Dawhaa thil phantu chun theida a hlaw hlak.
18. Mi mawlhai chu invetnan an inthuom a,Mi var chun hrietna tonlairang an ton hlak.
19. Mi suolhai chu mi tha hmaah kun an ta,Mi rilohai chu mi fel kot bulah kun an tih.
20. Pasiehai chu tuolbawmhai khomin an hnawl a,Mi hausahai ruok chun ruol an hau em em.
21. Tuolbawmhai hmusittu chu mi suol a na,Retheihai somdawltu chu mi hamtha a nih.
22. Thil suol rottu chun thil suol a thaw a,Thil tha zongtu chun mi ring le lainat a hlaw.
23. Thokrimna chun hlawkna an tlun a,Hril ringota tlak tum chu tlakranna a nih.
24. Mi var chu hausaknaa vurin a um a,Mi invet chun invetna chauh a hli hlak.
25. Hrepuitu indik chun mi a san suok a,Hrepuitu der ruok chun mi a hlem hlak.
26. LALPA titu chun kulpui nghet a nei a,A nauhaiin inhumhimnan an hmang hlak.
27. LALPA ti chu hringna tuikhur a na,Thina changa inthoka himna a nih.
28. Mipui hau hi lal ropuina a na,Khuo le tui nei lo lal chu a se der hlak.
29. Lung infuol chun hrietthiemna ril a nei a,Lung inrom chun a'n vetzie a phor lang hlak.
30. Lungril hadam chu taksa sukhriseltu a na,Thikthu siet chu ru sukhmontu a nih.
31. Retheihai neksawrtu chun anni Siemtu a hmusit a,An chunga ngilneitu chun anni Siemtu a chawimawi.
32. Mi rilo chu a suolna'n a buk thluk a,Mi fel chu thi chenin a ringumnan a hum hlak.
33. Hrietthiemna nei mi chun lungvar a nei a,Mi invet ruok chun thuvar a hriet thei nawh.
34. Indiknain hnam a chawi sang a,Suol chu hnam tin sukmuolphotu a nih.
35. Siehlaw var chungah lal a lawm a,A sukmuolphotu chungah a lungsen hlak.
←  Proverbs (14/31)  →