←  Proverbs (10/31)  →
1. Nau varin a pa a suklawm a,Nau invetin a nu a sukbeidong.
2. Indik loa hmu hausakna chun,Hlutna ieng khom a nei nawh;Indik taka thilthaw ruok chun,Thi ding khom a san suok hlak.
3. Mi felhai phingtam ding chu,LALPAN a phal ngai naw a,Mi rilohai duthusam khom,A hlawtling a phal bok nawh.
4. Mi thabo chu rethei a ta,Mi taima chu hausang a tih.
5. Nau var chun nipui hunah,Fak ding a sek khawm hlak a,Busik huna zal hlak ruok chu,Nau inzapuium a nih.
6. Mi indik lu chunga chun,Malsawmna vurin a um hlak a,Mi rilo bau suok ruok chu,Nunrawngna thuin a sip.
7. Mi indik hriet zui zing chu,Malsawmna a ni hlak a,Mi rilo hming ve ruok chu,A thu hmon vong hlak a nih.
8. Lungrila varna neitu chun,Thupekhai a zawm hlak a,Mi invet bau tam ruok chu,Sietna leh an intuok hlak.
9. Mi fel kalchawi a nghet a,Lam suol hrawtuhai ruok chu,Man suokin an um ngei hlak.
10. Mi mit rak hin lung a khei,Tlang taka kawktu ruok chun,Inremna a siem lem hlak.
11. Mi indik bau suok hai chu,Hringna tuikhur an inchang a,Mi rilo bau suok ruok chu,Nunrawngna thuin a sip.
12. Intheidana hrim hrim chun,Innghirnghona a hring a,Hmangaina chun tlak nawna,Iengkim a hmu khum lem hlak.
13. Lungril mit varna neihai chun,Thu var an sak suok hlak a;Hrietthiemna nei lo ruongzang chu,Vuokna hmol le inmat a nih.
14. Mi varin hrietna an khawl khawm a,Invet chun sietna ding an hril hlak.
15. Mi neinunghai kulpui chu,An hausakna a ni hlak a;Mi retheihai sietpui ruok chu,An pasietna a ni hlak.
16. Mi fel hlaw suok chu hringna a na,Mi suol hlaw suok chu hremna a nih.
17. Inthununna poisatu chun,Hringna lampui a hraw a,A ngai thei nawtu ruok chun,A pet hmangsan lem a nih.
18. Theidana iptu chun hmur khelhlip a nei a,Hrilsietna the dartu chu mi invet a nih.
19. Ei tong rawn taluo pha chun,Khel khom a thang sa tei hlak;Mi var chun tong a'n sum hlak.
20. Mi indikhai bau suok chu,Tangkaruo tha inhlir ang a na,Mi rilohai lungril ruok chun,Hlutna ieng khom a nei nawh.
21. Mi indik bau suok thu chun,Mi tam tak a chawm tlai hlak a,Mi invet chu varna tlasamin a thi.
22. LALPA malsawmnan mi a sukhausa a,Harsatna a thang sa ve ngai nawh.
23. Mi invet chun suol thaw inhoi a ta,Mi var ruok chun varna a hlimpui.
24. Mi rilo chun a ti tak intuokpui a ta,Mi fel chun a duthusam hmung a tih.
25. Thlipui a hung hrang pha chun,Mi rilohai an nuoi bo hlak a,Mi indikhai chu an nghet tlat hlak.
26. Thilthaw dinga mi thabo tir chu, Uoiin thurin ha a suktim ang le, Meikhu'n mit a sukthip ang a nih.
27. LALPA ti chu dam sawtna a na,Mi suol damsung ruok chu a tawi hlak.
28. Mi fel tuok ding chu hlimna a na,Mi rilohai hmabak chu boralna a nih.
29. LALPA lampuia kalchawi hi,Mi fel ta di'n himna kulpui a na,Thil tha naw thawtuhai ruok chun,Sietna chauh an hmasuon hlak.
30. Mi fel chu ngir nghet tlat an ta,Mi suol chun ram hi hluo zing naw nih.
31. Mi fel bau chun varna a phu suok a,Lei khelhlip ruok chu at tan ning a tih.
32. Mi fel bauin pom tlak thu a hril a,Mi suol bau chun thu letling a hril hlak.
←  Proverbs (10/31)  →