←  Numbers (19/36)  →
1. LALPA chun Mosie le Aron a biek a,
2. "Hi hi LALPA thupek anga danin a mamaw chu a nih: bawng la sen, hmel hem lo le la sor ngai der lo chu i kuoma hung kei dingin Israelhai hril rawh.
3. Bawng chu thiempu Eleazar kutah pe la, riebuk puo tieng inkeitir sien la, chu taka chun ama hmu ngeiah that raw hai se.
4. Thiempu Eleazar chun a kut par chang tieng bawng thisena chun zuk phum a ta, Intuokna Puon in hma tieng nghain voi sari a the ding a nih.
5. A hmu lai ngeiin bawng la chu a vun hai, a taksa hai, a thisen hai le a ek hai pumin raw vong an tih.
6. Thiempu chun sidar thing dam, hussop dam le sahmul senlar dam chawi a ta, bawng la sen an rawna meia chun buk a tih.
7. Chu zoah thiempu chun a silfenhai sawpin tui insil fai a ta, riebukah hung kir thei tang a ta, amiruokchu zan tieng chen inthieng nawna kai a tih.
8. A rawtu chun a silfenhai sawpin tui insil a ta, zan tieng chen inthieng nawna kai a tih.
9. "Inthieng nawna kai lo mi pakhatin bawng la sen vap chu inthiel a ta, khawhnawm hmun faiah a pei ding a nih. Hi meivap hi tuia inthienna an nei phaa hmang dingin Israel thlahai chun an sie tha ding a nih; chu chu suol sukfaina a nih.
10. Chun, bawng la sen vap inkhawmtu chun a silfenhai sawp a ta, zan tieng chen inthieng nawna kai a tih. Hi hi Israel thlahai le anni laia um ram dang mihai ta dinga kumkhaw dan ding chu a nih.
11. "Tu ruong khom ni sien, mithi ruong tawk taphot chu ni sari sung porche kai a tih.
12. A ni thumna le ni sarinaah inthienna tuiin intheng a ta, chu chun hung inthieng tang a tih. Ni thumna le ni sarinaah a'n thien naw chun porche kai zing a tih.
13. Tu khomin tu ruong khom a them a, a'n thien si naw chun LALPA biekbuk a sukporche a nih. Chuong ang mi chu Israel mihai laia inthoka tuithlar ding a nih. Inthienna tui chu the khum a ni naw leiin mi porche a na, a porchena chu amaah a kop zing a nih.
14. "Puon inah mi a lo thi chun, hi hi in thaw dan ding chu a nih: tu khom puon ina hung lut le chu taka um po po chu ni sari sung porche kai an tih.
15. Chun, bur le bel, sin nei lo po po khom porche kai vong bok a tih.
16. "Tuola kawlhnama mi that ruong amanih, thi pangngaia thi ruong amanih le mihriem ru amanih le thlan amanih tawk reng reng chu ni sari sung porche kai a tih.
17. "Chuonga porchena kai chu hieng anga inthien fai ding a nih: Bel ring rekah tui thar thun a, suol thawina bawng la vap kha bela tuia chun phul ding a nih.
18. Mi inthieng pakhatin hussop lain tuia chun phum sien, puon in le a sunga hmangruo po po le a sunga umhai chu the raw se. Mihriem ru amanih, thlan amanih, mi an that amanih le thi pangngaia thi amanih ruong tawkhai chu the khum bok raw se.
19. Mi inthieng chun mi porche chu a ni thumna le ni sarinaah tui chu the khum a ta, a ni sarina chun hung inthieng a tih. A silfenhai sawp a ta, insil a ta, zan tieng chun hung inthieng tang a tih.
20. Sienkhom, mi porche, inthien si lo chun, LALPA hmun thienghlim a sukporche leiin a mihai laia inthoka tuithlar ding a nih. Inthienna tui chu the khum a ni naw leiin a porche a nih.
21. Hi hi an ta dinga kumkhaw dan ding chu a nih."Inthienna tui thetu khom chun a silfenhai a sawp ding a nih. Chun, inthienna tui tawk taphot chu zan tieng chen porche kai a tih.
22. Mi porchein a tawk taphot chu a hung porche a, chu porche tawk taphot chu zan tieng chen porcheng a tih" tiin.
←  Numbers (19/36)  →