←  Numbers (12/36)  →
1. Mosie chun Kush mi nuhmeia a nei leiin Miriam le Aron chun Mosie chu an hrilsiet a.
2. "Mosie kuoma chauh maw LALPAN thu a hril bik chu? Keini kuoma khom a hril naw am a ni?" an ta. Chu chu LALPAN a lo hriet a.
3. Mosie chu pa inngaitlawm tak el, hnuoi chunga mi po po laia zaidam chungchuong a ni a.
4. LALPA chun Mosie le Aron le Miriam kuomah, "Hung suok unla Intuokna Puon inah mi hung hmu ro" a ti ta thut el a. Chuongchun, an pathum chun an va fe a.
5. LALPA chu sum ngirin a hung tum a, Puon in kotkhara chun a ngir a, Aron le Miriam chu a ko a, an pahni chun an hung suok a.
6. An kuoma chun, "Ka thu hi ngaithla ro. Nangni lai LALPA zawlnei an um chun a kuomah inlarin keima ka'n hriettir a, mangah ka biek hlak a.
7. Ka siehlaw Mosie kuoma ruok chu chuong ang chun ka thaw ngai nawh. Ama chu ka mi Israelhai chungah a ringum a nih.
8. Ama chu inhmatonin ka biek hlak a, thu khir hmang loin tlang takin ka biek hlak. Ama chu LALPA ruongam khom hmu ta sa a nih. Chuleiin, ka siehlaw Mosie hi ieng leia in soisel ngam am a na?" a lo ti a.
9. LALPA chu an chungah a lung a sen hle a, a fesan tawl tah a.
10. Chun, Puon in chunga sum a'n kieng chun, ngai ta, Miriam chu vur anga varin a lo inphar ta vong a. Ama tieng Aron a hang ngha chun a'n phar vong tah ti a hmu a.
11. Chuongchun Aron chun Mosie kuomah, "Aw pu, invetthlak taka suol kan lo thaw maw kha kan chungah intlaktir lul naw rawh.
12. A nu sula inthoka naute hlamzuia hung pieng, a taksa chenve zur zo tah ang em chun inumtir lul naw rawh" a ta.
13. Mosie chun LALPA a ko a, "Aw Pathien, sukdam hram raw khai" tiin a ngen a.
14. LALPA chun Mosie kuomah, "A pain a naunu hmaia chil a sakkhum ngot khom ni sari sung chu inzak a phur a ni naw am a ni? Khawhnawmah ni sari sie hmang inla, chu hnung chun riebukah la lut nawk thei in tih" a ta.
15. Chuongchun, Miriam chu riebuk puo tieng ni sari sung an sie a, an thuoi lut nawk hma chun mipui chu an inson nawh.
16. Chu hnunga chun mipuiin Hazerot chu an suoksan a, Paran thlalerah riebuk an khuor a.
←  Numbers (12/36)  →