Micah (1/7)  →
1. Judai ram lal Jotham hai, Ahaz hai le Hezekia hai inlal laia Moreset khaw mi Mika kuoma inlarnaa Samaria le Jerusalem chungthua LALPA thu hung tlunghai chu:
2. Hnam po pohai, lo ngai unla,Hnuoi le a sunga umhai, ngaithla ro,Lalpa PATHIEN chun a chengna,Hmun thienghlima inthokin,Nangni kal zawnga hrepuituah,A hung thang ding a nih.
3. Ngai ta! a chengnaa inthokin,LALPA chu hung tum a ta,Hnuoi hmun sanghai chil a tih.
4. Mei bula khuoihlu sie angin,A hmaah tlanghai chu zop an taTena tui luong thlur sung ang elin,Varuom inthler sungin siem a tih.
5. Hieng hi Jakob bawsietna lei le,Israel sungkuo suolna lei a nih.Jakob bawsietna bul chu iem?Samaria-ah a ni naw am a ni?Judai ram hmun sang chu iem?Jerusalem a ni naw am a ni?
6. "Chuleiin Samaria chu khaw ram,Hmunhnok deng bumnaah siem ka ta,Chu taka chun grep ching an ta,A lung chimhai chu kor ruomah,Inhlum thlapek vong ka ta,A lungphumhai dawk vong a tih.
7. A milem biekhai vaw nawi ka ta,Tempula an thilpekhai po po chu,Meiin raw hmang vong ka ta,A milemhai sukse vong ka tih.A thilpek dong po pohai chu,A nawchizorna man a na,Nawchi zorna man a ni ang hrimin,Nawchi inchawknan hmang an tih."
8. Hi lei hin tap khek ka ta,Ke lawng le saruoka invakin,Sihal angin inhram ka ta,Chingpirinu angin tuibira ka tih.
9. A hliemna dampui ruol an nawh;Judai ram khom a tlung ta a,Ka mihai chengna JerusalemKotkhar bul chen a lo tlung tah.
10. Gath khuoah hril naw unla,An hrietah tap der naw ro. Beth Ofra khuoa ruok chu,Pilvut lai zal inbuol ro.
11. Nangni Safira hmuna chenghai,Saruok le inzak takin,Ama chu fe pel unla,Zanan hmuna chenghai chu,Hung suok dok ngam naw ni hai.Beth Ezel chu lungngaiin a'n rum a,A'n humhimna a chan ta si.
12. Marot-a chenghai chu,Na tuorin an in-iel a,Dam nghakhlain an thlir a,Jerusalem kot bul chenin,LALPAA inthoka sietna chun,A hung nang phak ta si a.
13. Nangni Lakis-a chenghai,Sakor tawlailir chu buotsai ro,Zion naunu suolna bul chu,Nangni hi in ni si a;Israel bawsietna chu,Nangni-ah a um a nih.
14. Chuleiin Moreset Gath kuomah,Inthlana thilpek pe rawh. Akzib chu Israel lalhai ta dingin,Hlemtu la hung inchang a tih.
15. Maresa tukdol dingin,Hnetu la hung tir ka ta;Israel ropuina chun,Adulam la hung tlung a tih.
16. Pur doin lu vaw kol rawh,I nau dithai pur chu doin;Mulukol ang hiela kolin,A metin met kawng vong rawh,I kut ngeia inthokin salah,An thuoi hmang ding a ni si a.
      Micah (1/7)  →