←  Matthew (9/28)  →
1. Isu chu longah a chuong a, dil ral a kai a, a chengna khuo a hung tlung chun,
2. mi thenkhatin zeng pakhat hi a zalna puonpha pumin a kuomah an hung zawn a. An ringzie Isun a hmu chun zeng kuomah, "Ka naupa, lungmuong takin um rawh; i suolhai ngaidam a ni tah" a ta.
3. Chu phing leh Dan zirtirtu thenkhathai chun lungrilin, "Hi pa hin Pathien a hrilsiet a nih" an ta.
4. An ngaituona chu Isun a hriet a, "Ieng dinga in lungrilin thil suol in ngaituo am a na?
5. 'I suolhai ngaidam a ni tah' ti am 'Tho la, lawn rawh' ti hi a ieng am a olsam lem a?
6. Sienkhom, khawvela hin Mihriem Naupan suol a ngaidam thei ti inhriet theina dingin" a ta, zeng kuoma chun, "Tho la, i puonpha kha la la, inah fe ta rawh" a ta.
7. Chuongchun, chu pa chu a tho a, a in tieng a fe ta a.
8. Chu thil hmutu mipuihai chu maktinain an sip a, chuong ang thuneina mihriemhai kuoma petu Pathien chu an inpak a.
9. Chu taka inthoka Isu a suok chun siekhonna hmuna inthung mi pakhat a hming Mathai a hmu a, "Mi zui rawh" a ta, ama chu a tho a, a zui ta nghal a.
10. Isu le a zirtirhaiin Mathai ina zanbu an kil laiin sienkhontuhai le mi suolk tam takin an hung kilpui ve a
11. Farisaihaiin chu chu an hmuin a zirtirhai kuomah, "Ieng leia in zirtirtu hin siekhontu le mi suolhai lai bu a fak ve am a na?" an ta.
12. Chu chu a hrietin Isun, "Mi hriselhaiin daktor an mamaw naw a, mi borsawmhaiin a nih an mamaw lem.
13. Chuleiin, fe unla, 'Inthawina nekin lunginsietna ka dit lem'l ti hi iem a umzie va'n chuk ro. Mi felhai lam dinga hung ni loin mi suolhai lam dinga hung ka ni lem" a ta.
14. Johan zirtirhai chu Isu kuomah an hung a, "Iem a ta, Farisaihai le keini rawi hin bu kan nghei a, i zirtirhai hin an nghei ve si nawh?" an ta.
15. Isun an kuomah, "Anni lai moneitu a um sung chun mo lawma fielhai chun an sunm ding am a ni? Moneitu chu an kuoma inthoka thuoi hmang ni la hung tlung a ta, chu pha chun bu la nghei veng an tih.
16. "Tu khomin puon thar la rin mar loin puon hlui an phawk ngai nawh, a phawkna chun puon chu kei tawm a ta, inek nasa zuol a tih.
17. Uoiin thar khom savun peng hluiah an thun ngai nawh; an thun chun chu savun chu mor koi a ta, teng a ta, savun peng chu se vong a tih. Uoiin thar chu savun peng tharah an thun lem hlak, chuongchun him takin a um rel hlak" a ta.
18. Chuong thu chu an kuoma a hril laiin, roreltu pakhat a hung a, bokkhupin chibai a buk a, " Tu el khan ka naunu a thi a, sienkhom hung la, a chungah kut innghat la, dam nawk el a tih" a ta.
19. Isu chu a tho a, a zirtirhai le chun ama chu an zui ta a.
20. Nuhmei pakhat, kum sawm pahni thi puta damnaw hi a hnungah a hung a, a korfuol hmor a hung them a.
21. Chu nu chun a lungrilin "A korfuol hmor chauh khom them lang dam ka tih"a ta.
22. Isu chu a ngha kir a, ama chu a hmu a, "Ka naunu, thlamuong takin um rawh; i ringnan a sukdam che a nih" a ta. Chuongchun, nuhmei chu chu taka inthok chun a dam ta nghal a.
23. Isun hotupa in a va tlung chun theihle mut pawl le mipui so mur mur chu a hmu a,
24. "Lo inkieng ro. Naupang hi a thi nawh, a in a ni lem" a ta. Anni ruok chun an nuisan a.
25. Mipui chu tuolah an hnot suok vong hnungin inah a lut a, naupang kut chu a chel a, a hung tho tah a.
26. Chu thu chu a biel sunga chun a'n thang suok a.
27. Chu taka inthok chun Isu chu a fe pei a, mitdel pahniin an zui a. "Davida naupa, mi lunginsiet rawh" tiin an khek a.
28. In a lut chun mitdel pahnihai chu a kuomah an hung a, Isun an kuomah, " Hi hi ka thaw thei in ring am?" a ta.
29. Anni chun, "Ring e, Lalpa" an ta. Isun an mit chu a them a, "In ring angin in chungah hung tlung raw se" a ta.
30. Chuongchun, an mit chu a hung var tah a. Isun an kuomah, "Tu khom hril der naw ro" a ta.
31. Nisienlakhom anni chu an suok a, chu biel po poa chun a chanchin chu an hril dar tah a.
32. Chun, an fe suok lai mekin, ramhuoi zawl, tong thei lo pakhat hi, Isu kuomah an hung thuoi a.
33. Ramhuoi chu a hnot suok phing leh tong thei lo chu a hung tong thei ta a. Mipui chun mak an ti hle a, "Hieng ang thil hrim hi Israelhai lai hmu a la ni ngai nawh" an ta.
34. Farisaihai ruok chun, "Ramhuoi lal a ni leiin ramhuoihai a hnot suok hlak a nih" an ta.
35. Isu chun khaw lien le khaw tehai fangin, sunagoga hai Pathien ram Chanchin Tha hrilin a'n chuktir a, hri le natna chi hrang hrang invoihai chu a sukdam pei a.
36. Mipuihai chu vengtu nei lo beram ruol anga santu nei lo le hnawtoma um an nih ti a hmuin a lunginsiet tawl em em a.
37. Chuongchun a zirtirhai kuomah, "Bu sik ding a tam a, sinthawtu an tlawm si leiin, a loa bu siktu ding sinthawtu tir dingin lo Neitupa hni ro" a ta.
38. (A um nawh)
←  Matthew (9/28)  →