←  Matthew (14/28)  →
1. Chuong lai chun lal Herodan Isu chanchin a lo hriet a,
2. a siehlawhai kuomah, "Ama chu Baptistu Johan kha a ni chu; mithi laia inthokin a tho nawk a ni chu tie! Chuleiin, chuong thilthawtheina chu amaah a thok a ni chu" a ta.
3. Heroda chun a unaupa Filip nuhmei Herodi leiin Johan chu a man a, a khuop a, lung inah a khum a;
4. a san chu Johanin, "Herodi i nei hi a thieng nawh" a tipek lei a nih.
5. Heroda chun Johan chu sukhlum a nuom a, sienkhom mipuiin ama chu zawlneia an ngai leiin mipui chu a ti si a.
6. Heroda piengcham lawmnaah Herodi naunu a hung lam a, Heroda chu a suklawm em leiin,
7. a hni taphot pe dingin thu a'n kham a.
8. Ama chun a nu infui angin, "Thlengah, tu hin Baptistu Johan lu mi pe rawh" a ta.
9. Heroda chu a lungzing hle a, sienkhom a thu tiem lei le a ruoi kilpuituhai lei chun Johan lu chu pe dingin thu a pek a.
10. Chuongchun, mi a tir a, lung ina um Johan lu chu a va'n tantir a,
11. a lu chu thlengin an hung dom a, nunghak chu an pek a, ama chun a nu kuomah a fepui a.
12. Chun, Johan zirtirhai chun a ruong chu an inhlawm a, an phum a, Isu khom an hung hril a.
13. Isun a lo hrietin chutaka inthok chun longin hmun fienriel panin ama chauhin a'n tawl hmang a. Mipuiin an hriet chun an khuohaia inthok chun kein an zui a.
14. Longa inthoka va kam a kai chun mipui tam tak a hmu a, a lunginsiet tawl em em a, damnawhai chu a sukdam a.
15. Zan tieng a hung ni chun a zirtirhai chu a kuomah an hung a, "Hi hi hmun thlaler a na, khuo a'n hnu ta hle si a, khuoa hai fea an fak ding an inchawk theina dingin mipui hi infetir rawh" an ta.
16. Isu ruok chun, "An fe hmang a ngai nawh, nangnin fak ding pe lem ro" a ta.
17. Anni chun, "Hi taka hin bei phek nga le ngate pahni chauh naw chu ieng khom kan nei nawh" an ta.
18. Ama chun, "Ka kuomah hung chawi ro" a ta.
19. Hlobet chunga inthung dingin mipui chu thu a pek a, bei phek nga le ngate pahni chu a lak a, van tieng nghain mal a sawm a, a khoi a, a zirtirhai a pek a, zirtirhai chun mipui kuomah an sem a.
20. An rengin an fak a, an khop seng a, an fak mahla nawi an rut khawm chu bawm sawmpahni sip a nih.
21. A fatuhai chu, nuhmei le naupang tiem loin, patling ngot khom sangnga lai an nih.
22. Mipui a'n tintir sungin ral khing tieng lo kai hmasa dingin a zirtirhai chu longin a'n fetir a.
23. Mipui an tintir zo chun ama chu tongtai dingin tlangah a fe hrang a, zan tieng a hung ni chun ama khat chauh a ni tah a.
24. Long chu va kama inthoka hla tak a tlung tah a, thliin a naw zawnga a nor leiin, tuifawnin a tawm leng a tawm leng a.
25. Khawfingchat tawmin dil chungah anni tieng panin a hung lawn a.
26. Zirtirhaiin dil chunga lawn an hmu chun "Phung a ni saw" an ta, thlaphangin an khek chul a.
27. Nisienlakhom, Isun anni chu a biek nghal a, "Thlaphang naw ro. Kei ka nih annawm. Ti naw ro" a ta.
28. Peter chun a don a, "Lalpa, nang i ni chun, tui chunga i kuoma hung thu mi pe rawh" a ta.
29. Isu chun, "Hung ta la" a ta. Peter chu longa inthokin a suok a, Isu panin tui chunga chun kein a lawn a.
30. Nisienlakhom, thli hrang chu a hmuin a ti a, a pil tan ta a, "Lalpa, mi san rawh" tiin a khek a.
31. Isun a hei ban nghal a, a chel a, a kuomah "Nang, ringna tlawm, ieng dinga i ringhlel am a na?" a ta.
32. Longa an lut chun thli chu a re tah a.
33. Longa umhai chun, "Pathien Naupa i lo ni takzet hi" tia bokkhupin an chawibiek a.
34. Dil an kan chun Genesaret ramah an kai a.
35. Chu hmuna mihaiin Isu a nih ti an hriet chun an se vel ram po poah mi an tir a, damnaw po po a kuomah an hung thuoi a;
36. a puon hmor chauh khom them an ngen a, a them taphot an dam pei a.
←  Matthew (14/28)  →