←  Mark (8/16)  →
1. Chuong lai vel bok chun mipui tam tak an hung pung khawm nawk a. Fak ding ieng khom an nei naw leiin Isun a zirtirhai chu a ko a,
2. "Mipuihai hi ka lunginsiet a nih; ni thum zet ka kuomah an um tah a, fak ding hlak an nei si nawh;
3. phingtama kan tintir chun lam lakah tamsawl rawi an tih, a then lem chu an hungna a hla si a" a ta.
4. A zirtirhai chun, "Tuin am hieng ang ram pilrilah mi hieng zozai hraina khop bei an hmu zo ding?" tiin an don a.
5. Ama chun, "Bei phek ieng zat am in nei a?" a ta. Anni chun, "Phek sarih" an ta.
6. Mipuihai chu hnuoiah inthung dingin thu a pek a. Bei phek sari chu a lak a, lawmthu a hril zoin a khoi a, mipui lai sem dingin a zirtirhai chu a pek a, an sem a.
7. Ngate tlawmte an nei bok a, chuonghai khom chu lawmthu a hril zoin a zirtirhai chu an semtir a.
8. Mipui chun an fak a, an tlai ta seng a. An fak bang zirtirhaiin an rut khawm chu bawm sari sip a nih.
9. Anni rawi chu sangli lai an nih.
10. A'n tintir zo chun ama khom a zirtirhai leh longin Dalmanuthal bielah an fe tah a.
11. A kuomah Farisaihai an hung a, an hung sel a. Ama fiena dingin vana inthoka inchikna thilmak inentir an phut a.
12. Lung intar taka inrum suokin, "Ieng dinga tu lai ruoltharhai hin inchikna an zong am a na? Thu dik ka hril cheu hi, inchikna thilmak hrim hrim pek ni naw ni hai" a ta.
13. Chuongchun, anni chu a maksan a, longah a chuong a, ral khing tieng panin a fe tah a.
14. Zirtirhai chun bei an lo chawi theinghil a, longa chun bei phek khat chauh naw chu a dang hrim an nei nawh.
15. Isu chun, "Farisaihai chol le Heroda chol laka chun inveng unla, fimkhur hle ro" tiin anni chu an fui a.
16. Anni rawi chun, "Bei ei nei der naw leia a hril a nih" tiin an inhril tuo a.
17. Isun chu chu a lo hriet a, "Bei in nei naw thu ieng dinga in buoipui am a na? Tu chen khom hin hmu thei loin, in la man fuk thei naw zing a ni maw? Chuong lawm chun in lungril a lo chawlol a ni maw?
18. Mit nei siin in hmu thei naw a ni? Na nei siin in hriet thei naw rop maw? An leh, in theinghil hman el am an ta?
19. Bei phek ngaa mi sangnga ka hrai tum khan fak mahla bawm ieng zat am in rut sip a?" a ta. Anni chun, "Bawm sawmpahnih" an ta.
20. "An leh, bei phek saria mi sangli ka hrai khan ieng zat am in rut a?" a ta. "Bawm sari" an ta.
21. Chuongchun, an kuomah, "Chuong sa khom chun a ngaina in la hriet naw rop maw?" a ta.
22. Bethsaida an hung tlung a, mi thenkhatin mitdel pakhat an hung thuoi a, ama chu them dingin Isu an ngen a.
23. Isun mitdel chu a banah a kei a, khaw puo tieng a thuoi suok a. A mitah chil a sak a, a them zoin Isun, "Khuo i hmu thei am?" a ta.
24. Ama chu a hung dak suok a, "Mi ka hmuh, thing lawn angin ka hmu tawl" a ta.
25. Isun a mit chu a hang thempek nawk a. Chuongchun a mit a hung meng a, a hung dam fel a, iengkim chieng takin a hmu thei tah a.
26. Isun a kuomah "Khuoah lut ta loin in tieng fe nghal rawh"m a ta.
27. Isu le a zirtirhai chun Filip Kaisari se vela khuohai chu an fang a. Lampuia chun a zirtirhai kuomah, "Mihaiin tum a nih an mi ti a?" tiin an don a.
28. Anni chun, "Baptistu Johan ti che an um a; Elija ti che an um bok a; a then ruok chun zawlnei tu amanih an ti che" an ta.
29. Ama chun, "An leh, nangnin tu am nia in mi hriet?" a ta. Peter chun, "Kristan chu i nih" tiin a don a.
30. Isu chun a nina chu tu khom hril lo dingin a ti tlat a.
31. Chuongchun, Mihriem Naupan thil tam tak a tuor ngei ding thu dam, upahai, thiempu lalhai le Dan hretuhaiin an hnawl ding thu dam, an sukhlum ding thu le a ni thumnaah a tho nawk ding thu dam chu a zirtirhai a hril tan tah a.
32. Tlang takin chuong thuhai chu a hril tawl leiin Peter chun ama chu a thuoi hrang a, a kawk a.
33. Isu ruok chun naw tieng nghatsana a zirtir danghai tieng chu enin, "Setan, fe hmang dai rawh; Pathien thil ngaituo loin mihriem thil i ngaituo a ni hi" tiin Peter chu a kawk let a.
34. Mipuihai chu a zirtirhai le chun a ko khawm a, an kuomah, "Tu khomin a mi zui nuom chun mani insie hmangin, mani kraws putin mi zui raw se.
35. Tu khom mani hringna hum tum chun chan a ta, tu khom keima le Chanchin Tha leia hringna chan chun hum a tih.
36. Miin khawvel pumpui hi nei sien, a hringna chan si sien la, a ta dingin iem hlawkna a um a?
37. Miin a thlarau le inthleng dingin iem peng a ta?
38. Tu lai ruolthar uire hmang le mi suolhai laia kei le ka thu inzapui taphot chu, Mihriem Naupa hi a vantirko thienghlimhai le a Pa ropuinaa inthuoma a hung pha chun ama chu inzapui veng a tih" a ta.
←  Mark (8/16)  →