←  Mark (15/16)  →
1. Zingkar inhma takin thiempu lal hai, upa hai, Dan zirtirtuhai leh Sanhedrin po po chun ro an rel a; Isu chu an khit a, an thuoi hmang a, Pilat kutah an inhlan a.
2. Pilat chun, "Judahai lal i ni maw?" tiin a lo indon a. Ama chun, "Ni e, i ti annawm" a ta.
3. Thiempu lalhai chun kong tam takin an hek a.
4. Chuongchun, Pilatin, "An hekna zozai che hi i hriet naw maw? I don der naw ding maw?" tiin a'n don nawk a.
5. Nisienlakhom, Isun a don chuong naw leiin Pilat chun mak a ti hle a.
6. Kut niin tang pakhat insuopek dinga mipuiin an hni taphot chu Pilatin a'n suopek hlak a.
7. Helna a suok tuma tuol that leia hel pawl an man le lung ina an khumhai lai chun mi pakhat a hming Barabas a um a.
8. Chuongchun, mipui chu an hung a, a thaw hlak anga thaw dingin an ngen a.
9. Ama chun, "Judahai lal hi insuopek lang cheu in nuom am?" a lo ta.
10. Thikna leiin Isu chu thiempu lalhaiin a kutah an hung inhlan a nih ti Pilatin a hriet si a.
11. Amiruokchu, Barabas insuo hni lem dingin thiempu lalhai chun mipui an infui por a.
12. Pilat chun, "Chuong a ni si chun Judahai lal in ti hi ieng tia thaw dingin am in dit a?" tiin a'n don nawk a.
13. Anni chun, "Hemde rawh" tiin an khek a.
14. Pilat chun, "Ieng leiin am ie? Iem a thaw suol a?" a ta. Nisienlakhom, anni chun inring nawk zuolin, "Kraws-ah hemde rawh" tiin an khek a
15. Chuongchun, mipui chu suklawm nuomin Barabas chu a'n suopek a; Isu ruok chu a'n vuoktir a, kraws-a hemde dingin an kutah a pek suok ta a.
16. Sipaihai chun Isu chu lal in sung, Praitorian an tia chun an thuoi a, an pawla mi po po chu an ko khawm a.
17. Ama chu korfuol senduk an inhaktir a, a lallukhum dingin hling an inkuol a, an inkhumtir a.
18. "Chibai, Judahai lal" tiin an inriem khum a.
19. Hmolin a luah an vuok an vuok a, chil an sakkhum a, dingthathuonin chibai an buk el huoi huoi a.
20. Chuonga nuizat siemnaa an hmang zo chun korfuol senduk chu an hlippek a, ama silfen an inhaktir nawk a, kraws-a hemde dingin an thuoi suok tah a.
21. Mi pakhat Simon, Kurini khaw mi, Aleksandra le Rufa hai pa, thingtlanga inthoka hung chu Isu kraws putpui dingin an man lui a.
22. Golgotha, 'Lu ru hmun' an ti chu an thuoi tlung a,
23. murra pol uoiin an pek a, nisienlakhom a dawn nuom naw a.
24. Chuongchun, kraws-ah an hemde a. A silfenhai chu insemin, an chan ding seng hrietna dingin thum an vawr a.
25. An hemde hun chu zing dar kuob vel a nih.
26. Ama an hekna thu, "JUDAHAI LAL" ti chu an tar a.
27. Ama ruol chun suomhmang pahni an hemde bok a, a chang tieng pakhat, a voi tieng pakhat.
28. Pathien Lekha thua, "Ama chu bawsetuhai lai tiem sain a um a" ti kha chuong ang chun a hung tlung indik tah a nih.c
29. Mi invel nuk nuk hai chun an lu thinin, "E hei! Nang, tempul thieka ni thuma bawl nawk theitu,
30. insukdam la, kraws-a inthok khan hung tum ta la" tiin an biek el a.
31. Chuong ang bokin thiempu lalhai le Dan zirtirtuhai chun, "Mi dang hman sukdam hlak si, mani insukdam thei si lo.
32. Ama ei ring theina dingin ei mit hmua ngei Krista, Israel lal chu tuhin kraws-a inthokin hung tum raw se chu" tiin an nuisaw a. Ama ruola an hemde pakhat khom chun a lo deusaw bok a.
33. Sun dar sawmpahnia inthoka chawhnung dar thum chenin khawvel pumpui chu a'n thim ta vong a.
34. Chawhnung dar thum vela chun rawl inring takin, "Eloi. Eloi, lama sabakthani" tiin a khek a (chu chu "Pathien, Pathien, ieng dinga i mi maksan am?" tina a nih).
35. A bula ngir thenkhatin chu chu an hrietin, "Ngai ta u, Elija a ko a ni chu" an ta.
36. Mi pakhat a tlan a, siponah uoiin thur a'n chie a, hmolah a tar a, Isu chu indawntir a tum a, "Ama la thla dingin Elija a hung hrim am, en ei tiu" a ta.
37. Isu chu rawl inring takin a khek a, a hnuk a chat tah a.
38. Chun, tempula puonzar chu a chung tienga inthoka a hnuoi tieng chenin a'n thler vong a.
39. A hma zawna ngir sipai zahotu, chuonga a khek ri hrea a thi dan hmutu chun, "Hi mi hi Pathien Naupa a lo ni ngei hi tie!" a ta.
40. Nuhmei ruol khomin hla taka inthokin an thlir a, chuonghai lai chun Mari Magdalin hai, Jakob chin lem le Jose nu Mari hai le Salomi hai khom an thang a.
41. Hieng mihai hi Galili rama a um laia ama zuia a rong bawlpek hlaktuhai an nih; chun, anni ruola Jerusalema hang fe ve nuhmei dang tam tak an thang sa bok a.
42. Judahai Inrinnid a ni a (chu chu Sabat dinga an inbuotsai ni a nih).
43. Zan tieng a hung ni chun Josefa, Arimathai khuoa mi, Judahai Rorelna Inpuia membar pakhat, mi inzaum tak, Pathien ram beisei mi chu huoi takin Pilat kuomah a fe a, Isu ruong a hni a.
44. Pilat chun a thi tah ti a hrietin mak a ti hle a, sipai zahotu chu a ko a, a thi hun a'n don a.
45. A thi ngei tah ti sipai zahotu baua inthoka a hriet hnung chun Isu ruong chu Josefa a pek a.
46. Chuongchun, ruong tuomna ding puon a'n chawk a, chu chun a tuom a, lung ker thlanah a'n zal a, thlan kotkhar chu lungkharin a khar a.
47. Mari Magdalin le Jose nu Mari khomin Isu an inzaltirna thlan chu an hmu a.
←  Mark (15/16)  →