←  Mark (13/16)  →
1. Tempula inthoka an suok lai chun a zirtir laia pakhatin a kuomah, "Zirtirtu, en ta, an lung hmang dam hi a hromhrawin an bawl ropui kher el!" a ta.
2. Isun a don a, "Hieng in ropui tak tak hi i hmu maw? Hieng lung inthuo po po hi pakhat khom sukchim loa maksan um naw nih" a ta.
3. Tempul ep, Oliv tlanga Isu a'n thung laiin Peter hai, Jakob hai, Johan hai le Andri hai chun a falin thu an indon a;
4. "Chuong thil chu iengtik am hung tlung a ta ? Chuong po po a hung tlung ding pha chun inchikna thilmak ieng am hung um a ta? Mi hril rawh" an ta.
5. Isun an kuomah, "Tu khomin an hlem nawna ding cheuin fimkhur ro.
6. Ka hming salin, "Krista chu ka nih" tiin mi tam tak hung suok an ta, mi thuoi hmang teu an tih.
7. Indo ri hai, indo thuthang hai in hriet pha leh thlaphang naw ro; chuong chu a hung tlung ding hrim a na, hun tawp ruok chu la ni hri naw nih.
8. Hnam dang le hnam dang, ram dang le ram dang indo an ta, hmun hrang hrangah lir inhning a ta, tam tlang a tih. Chuong chu nau hase intanna ang ning a tih.
9. "Nangni chu inring zingin um ro. Roreltuhai kutah imantir an ti cheu a, sunagog-ah hai vuong an ti cheu a, keia leiin larsap le lalhai hmaah, ka thu an hriet theina dingin, inngirtir an ti cheu.
10. Chanchin Tha hi hnam po po kuomah hril hmasak ngei ding a ni si a.
11. An man cheu a, in chungthu rel dinga an inhlan hun cheu chun hril ding ngaituo lawkin lungkham naw ro; a hun taka hung inlang taphot chu hril el ro, a hriltu chu nangni in ni awm si nawh, Thlarau Thienghlim ni lem a tih.
12. Sukhlum dingin unau le unau inmantir an ta, pa khomin a naupa, nauhai khomin an nu le pahai do an ta, insukhlumtir bok an tih.
13. Ka hming leiin mi tinin theidang an ti cheu a, nisienlakhom a tawp chena sel taka tuor taphot chu, chu ngei chu sandam ning a tih.
14. "Sukramtu tirdakum chu a ngir nawna ding hmuna ngir in hmu pha chun (a tiem taphotin a umzie hre raw se), Judai rama umhai chu tlang ramah tlan raw hai se.
15. In chunga um chu in sunga thuomhnaw inchu dingin tum naw raw se.
16. Loa fe khom a thuomhnaw inchu dingin inah kir nawk naw raw se.
17. Chu huna chun nau paihai le naute pom lai neihai chung chu rik a tih.
18. Chu chu phalbi lai a hung tlung nawna dingin tongtai ro.
19. Chuong nihai chu rimsikna ni a ni ding a ni si a; chuong anga rimsikna nasa hrim hrim chu Pathienin leilung a siema inthokin a la um ngai nawh; ieng tik khom um nawk ta ngai bok naw nih.
20. Lalpan chuong nihai chu suktawi naw sien chu, mihriem tu khom dam suok um naw ni hai; sienkhom a mi thlanghai leiin a suktawi a nih.
21. Chu huna chun tu khomin in kuomah, "En ta u, Krista chu hi taka hin a um" amanih, "En ta, saw va sawh" amanih an ti chun awi naw ro.
22. Krista tehlem le zawlnei tehlemhai an hung suok ding a ni si a, theihai sien la lem chu, thlanghai meuh khom thuoi hmang dingin inchikna thilmakhai thawng an tih.
23. Nangni ruok chu fimkhur ro, iengkim ka hril vong ta cheu hi.
24. "Chuong ang hun rinum a liem hnung chun nisa inthim a ta, thla khom var bok naw nih;
25. vana inthokin arasihai til an ta, vana thilthawtheinahai chu sukhningin um a tih.
26. Chun, Mihriem Naupa hi thilthawtheina nasa tak leh ropui takin sum laia hung hmung an tih.
27. Chuongchun, a vantirkohai chu tir suok a ta, a mi thlanghai chu kawlkil li, hnuoi tawpa inthoka van tawp chenin lawr khawm a tih.
28. "Chuongchun, theichang kunga inthokin thil umzie inchuk ro. A hung indawn a, a hna a hung inder chun nipui a ni ding an tah ti in hriet hlak.
29. Chuong ang bokin, nangni khomin chuong po po chu a hung tlung in hmu pha chun ama chu a hung hnai tah a, kotkhar bulah a um tah ti hre ro.
30. Thu dik ka hril cheu hi, chuong po po chu a hung tlung hma chun tu lai mihaiw hi bo naw ni hai.
31. Hnuoi le van bo a ta, ka thu ruok chu bo naw nih.
32. "Nisienlakhom, chu thil hung tlung hun ding ni le darkar chu Pa chauh naw chun tu khomin, vantirkohai khomin, Naupa khomin, an hriet nawh.
33. Fimkhur unla, inring zinga umin tongtai ro, a hun chu in hriet si nawh.
34. Mi, ram danga inzin dingin a siehlawhai kuomah an sin puol seng maw inphurtir a, kotkhar vengtu khom inring zinga um dinga thu a pek hieu hnunga a fe ta daih ang hi a nih.
35. Chuleiin, inring zingin um ro. In neitupa hung hun ding chu zan tieng amanih zan ril amanih, zing arkhuon amanih, zingkar amanih ding in hriet si nawh;
36. a hung thut chun inin hung hmu hlauh rawi a ti cheu.
37. In kuoma ka hril hi mi po po ta dinga ka hril a nih: inring zingin um ro" a ta.
←  Mark (13/16)  →