←  Luke (4/24)  →
1. Isu chu Thlarau Thienghlima sipin Jordan vadunga inthokin a kir nawk a, Thlarauin thlalerah a thuoi a, chu taka chun ni sawmli sung Diebolin a thlem a.
2. Chu hun sung po po chun ieng khom a fak naw a, a tawpah a phing a hung tam ta hle a.
3. Chuongchun Diebolin a kuomah, "Pathien Naupa i ni takzet chun hi lung hi beia inchang dingin thu pe rawh" a ta.
4. Isu ruok chun, " 'Mihriem hi bei chauin a hring nawh' ti ziek a nih" a ta.i
5. Chu zoa chun Diebolin hmun insang takah a thuoi a, voi le khatah khawvela lalram po po a'n entir a.
6. Diebol chun a kuomah, "Hieng po po chunga thuneina le ropuina hi peng ka ti che; ka kuoma pek vong a ni tah a, ka nuom nuom ka pek thei a nih.
7. Mi chawibiek la, i ta ni vong a tih" a ta.
8. Isu ruok chun, " 'Lalpa i Pathien chawibiek la, ama rong chauh bawl rawh' ti ziek a nih" a ta.j
9. Diebol chun Jerusalemah a thuoi a, tempul sipzumah a'n ngirtir a. "Pathien Naupa i ni takzet chun hi taka inthok hin inchawm thla rawh:
10. Vantirkohai thu peng a ta,I lam tinah veng an ti che;
11. An kutin chawi an ti che a,Lungah i ke sui naw ti nih' ti ziek ang khan" a ta.
12. Isu chun, " 'Lalpa i Pathien fie naw rawh' ti ziek a nih" tiin a don a.
13. Diebolin thlemna tinrenga a thlem hnung chun remchang nawk huna dingin a fesan tah a.
14. Isu chu Thlarau thilthawtheina leh Galili ramah a kir nawk tah a, a chanchin chu a ram phekin a'n thang vel a.
15. Sunagogah hai mi a zirtir a, mi tin inpak a hlaw a.
16. A seilienna Nazaret khuo chu a hung tlung a, a thaw dan pangngaiin Sabat ni chun Sunagog-ah a lut a, thu tiem dingin a ngir a.k
17. Zawlnei Isai lekhabu chu an pek a, lekhabu zuol chu a sut a, hi lai thu hi a hang phar a:
18. "Lalpa Thlarau chu ka chungah a um a,Riengvaihai kuomah Chanchin Tha,Hril dingin hriek a mi nal a;Saltanghai zalenna ding thu dam,Mitdelhai mit varna ding thu dam,Neksawra umhai sansuokna thu dam,
19. Lalpa lungawi kum thu damPuong dingin a mi tir a nih."
20. Lekhabu chu a zuol a, rongbawltu chu a pek nawk a, a thung nawk a. Sunagoga inkhawm po po mit chu a chunga a fu thup a.
21. Ama chun an kuomah, "Hi Pathien Lekha thu hi voisun hin in hrietah a hung tlung tah" tiin a hril tan a.
22. An reng chun an inpak a, a bau thu suok ditum tak chu mak an ti hle a, "Hi mipa hi Josefa naupa kha a ni nawm a nih?" an ti tawl a.
23. Ama chun an kuomah, " 'Daktor, nang insukdam rawh' an ti hlak ang hin nangni khomin 'Kapernaum khuoa i thilthaw kan hriet ang kha i khuoa khom hin thaw ve ta la' in mi la ti ngei awm hi" a ta.
24. A hril pei a "Thu dik tak ka hril cheu hi, zawlnei tu khom ama khuo tieng mihaiin an lawm ngai nawh.
25. Diktak chun, Elija dam laia kum thum le thla ruk khuo a'n thal a, khawvela tam nasa tak a tlak lai khan, Israel ramah hmeithai tam tak an uma chu an kuomah Elija kha tir a ni naw a,
26. Sidon biela Sarepta khuoa hmeithai pakhat kuoma chauh tir a ni lem kha.
27. Zawlnei Elisa dam lai khom khan, Israel ramah phar tam tak an uma chu, anni lai Suria mi Naaman ti chauh naw chu tu khom sukthieng an ni naw kha" a ta.
28. Sunagoga inkhawmhaiin chuong thu an hriet chun an lung a khei em em a.
29. Chuongchun, an tho a, khuoa inthok chun an hnuk suok a, rawla nam thla dingin an khaw bul rawl koa chun an thuoi a.
30. Nisienlakhom, mipui chu a tan tlang a, a fesan tawl tah a.
31. Galili rama khaw pakhat Kapernaumah a zu fe a. Sabat ni chun mihai a zirtir a,
32. thu nei taka a'n chuktir lei chun a zirtirna chu mak an ti hle a.
33. Sunagoga chun ramhuoi zawl pakhat, thlarau tirdakum kol a um a, ama chu rawl inring taka khekin,
34. "Eheu! Nazaret Isu, nangin ieng am mi law i tum a na? Mi sukse dingin i hung a ni maw? Tu'm i nih ti ka hriet- Pathien Mi Thienghlim chu i nih" a ta.
35. Isu chun a hal a, "To la, a sunga inthok khan hung suok rawh" a ta. Ramhuoi chun hnuoiah a sukthluk a, sukna loin a suoksan tah a.
36. An reng chun mak an ti a, "Hi hi ieng thu am an ta leh? Thuneina le thilthawtheina hmangin thlarau tirdakumhai khom thu a pek a, an suok el ta hi!" an ta.
37. Chuongchun, chu lai khaw se vela chun a chanchin chu a'n thang tah a.
38. Chun, a tho a, Sunagoga inthok chun Simon inah a lut a. Simon tarpi chu a khawsik a'n sang leiin Isu thangpuina ama nu ta dingin an ngen a.
39. A khum bula chun a va ngir a. khawsik chu a hal a, a re tah a. Chuongchun, a tho thei ta nghal a, fak rong a bawlpek a.
40. Nisa tlak vel lai chun damnaw, natna chi hrang hrang neihai chu Isu kuomah an hung thuoi a, an chungah kut a lo innghat a, a sukdam tawl a.
41. Ramhuoihai khomin, "Pathien Naupa i nih" tia khekin mi tam tak sunga inthokin an hung suok bok a; anni chu Isun a hal a, Krista a nih ti an hriet leiin an tong a phal nawh.
42. A zing vartien chun hmun fienrielah a fe a, mipuiin an zong a, a kuomah an hung a, anni chu fesan lo dingin an thlo a.
43. Nisienlakhom, ama chun, "Khaw danga khom Pathien Chanchin Tha ka hril a tul, chu dinga tir ka ni si a" a ta.
44. Chuongchun, Judail ram sunagoga hai a lut a, thu a hril zui ta pei a.
←  Luke (4/24)  →