←  Leviticus (6/27)  →
1. Chun, LALPA chun Mosie a biek a,
2. "Tu khomin LALPA lakah thil suol thaw a, ringum lo taka um a, tuolbawmhaiin a kuoma thil an dande amanih le inkoltir chungthu amanih, thil inhmang thu amaniah mi hlem a,
3. mi thil inhmang hmu sia hmu lo anga inhril a, khela inkham a, mihaiin suol an thaw hlak hrim hrim laia a ieng khom a thaw chun,
4. suol a thaw leia thiem naw a chang pha leh mi thil a'n ruk le laklui po pohai, miin thil an inkoltir po pohai, mi thil inhmang a hmuhai,
5. an naw leh khela a'n khamna thil po pohai chu a pekkir vong ding a nih. A kima a rul vong bakah hmun ngaa thea hmun khat hu chu a chuongin a pek belsa ding a nih; thiem naw inthawina thilhlan a'n hlan ni chun a neituhai kuomah a pekkir vong ding a nih.
6. A bawsiet man tlakna dingin LALPA hmaah thiempu kuomah thiem naw thilhlan dingin beram ruol laia mi beram chal, hmel hem lo hung kei a ta, a bawsietna man hu zat sum hung chawi bok a tih.
7. Chuong ang chun thiempu chun LALPA kuomah inremna inthawina inhlanpek a ta, thiem naw changna dinga a thilthaw po po lakah ngaidamin um a tih.
8. Chun, LALPA chun Mosie a biek a,
9. "Aron le a naupahai kuomah hi thupek hi hril rawh: 'Hieng hi pumraw thilhlan phaa an inthawi dan ding chu a nih: pumraw thilhlan chu maicham chunga a rawnaa chun zankhuoin, a tuk zing chenin a um ding a na, zankhuoin maichama mei chu a mit ding a ni nawh.
10. Thiempu chun puon zai inhmia siem silfen inbel a ta, a taksa inkhumtu dingin puon zai inhmia siem kekor hnuoi bun bok a ta, pumraw thilhlan kang vaphai chu inthiel a ta, maicham sira chun sieng a tih.
11. Chu zoah a silfenhai inthlak a ta, silfen dangin inthuom a ta, a vaphai chu khawhnawm hmun faiah fepui a tih.
12. Maicham mei chu chok zing a ta, a mit ngai ding a ni nawh. Zing tinin thiempu chun thing buk sang a ta, pumraw thilhlan chu sie fel a ta, inremna thilhlana a sa thau chu a raw ding a nih.
13. Maichama mei chu maichamah chok zing a ta, a mit ding a ni nawh.
14. " 'Chun, bu le bal thilhlan thaw dan ding chu hieng ang hi a nih: Aron naupahai chun maicham bulah, LALPA hmaah an hung chawi ding a nih.
15. Thiempu chun beiphit indip taka mi chu vei khat lang a ta, hriek le beraw chu la bok a ta, chuonghai chu LALPA suklawmtu, hriet zingna rimtui dingin maichamah a raw ding a nih.
16. An inhlan banghai chu Aron le a naupahaiin hmun thienghlimah chol thang loin fang an ta, Intuokna Puon in tuol zawla chun an fak ding a nih.
17. Chol thangin bei in ur ding a ni nawh. Meia ka kuoma thil an inhlan laia anni chanpuol dinga ka pek a nih. Chu chu suol thawina le bawsiet thawina anga thil thienghlim tak a nih.
18. Aron thla pasal po poin fa thei an tih. Chu chu LALPA ta dinga pumraw thilhlan chungthua a thla peihai chena an kumkhaw chan chu a nih. A tawk taphot chu ser thieng ni pei an tih' tiin thu pe rawh" a ta.
19. Chun, LALPA chun Mosie a biek a,
20. "Aron le a naupahai hriek i nal phaa LALPA kuoma an thilhlan inhlan ding chu hi hi a nih: beiphit indip tak, kilogram khat ning a ta, a zing tieng a zatve, zan tieng a zatve an inhlan ding a nih.
21. Hriek leh thleng kumah hmet unla, inhmet zoi hne pha leh hung chawi unla, a phek chikte tea khoiin bu le bal thilhlan, LALPA ta dinga rim inhnikah in inhlan ding a nih.
22. A naupahai laia mi, hriek nal tah, thiempua a la hung thlaktu ding chun buotsai a tih. LALPA chanpuol a ni leiin raw fai vong ding a nih.
23. Thiempuin bu le bal thilhlan a'n hlan reng reng chu raw fai vong ding a na, fak der lo ding a nih" tiin.
24. Chun, LALPA chun Mosie a biek a,
25. "Aron le a naupahai kuomah hieng hin hril rawh: 'Hi hi suol thawi dan ding chu a nih: pumraw thilhlan in thatna hmunah suol thawina ran khom LALPA hmaah in that ding a nih; chu chu thil thienghlim tak a nih.
26. Suol thawina inhlantu thiempu chun Hmun thienghlim, Intuokna Puon in kot zawlah inthawina sa chu fang a tih.
27. A sa tawk taphot chu hung thienghlim an tih; a thisenin silfen a khiengna taphot khom hmun thienghlima ngei sawp thlak ding a nih.
28. A sa suongna chu pil bel a ni chun sukkoi ding a na, dar bel a ni ruok chun nawt fai a, tuia intleng fai ding a nih.
29. Thiempu sungkuoa mi pasal taphotin a sa chu fa thei an tih; thil thienghlim tak a ni si a.
30. Amiruokchu, suol thawina dinga ran inhlan, inremna siemna dinga hmun thienghlim, Intuokna Puon ina a thisen an hung lak lut ruok chu a sa fak ding a ni nawh; raw hmang ding a nih.
←  Leviticus (6/27)  →