←  Leviticus (24/27)  →
1. LALPAN Mosie a biek a,
2. "Khawnvar sit var a ni zing theina dingin, oliv hriek fim tak, khawnvara insit dinga sawr ngei chu i kuoma hung chawi dingin Israel nauhai hril rawh.
3. Intuokna Puon ina Thuthlung Bawm hmaa puonzar puoa chun LALPA hmaah khawnvarhai chu sit var a ni zing theina dingin zan tienga inthoka zing tieng chenin Aronin enkai a tih. Hi hi thang la hung thar pei dinga khom in kumkhaw dan chu a nih.
4. LALPA hmaa um rangkachak hlira siem khawnvar siena le khawnvarhai chu a enkai zing ding a nih.
5. "Chun, beiphit indip tak kilogram sawmpahni la la, bei thawp sawmpahni ur la, bei pakhat siemnaah beiphit kilogram khat pei hmang rawh.
6. LALPA hmaa rangkachak dawkan chunga chun bei chu tlar hniin rem la, tlar khatah bei paruk pei intieng rawh.
7. Bei tlar hni chung ve vea chun beraw fim tak, LALPA hmaa meia thilhlan anga bei khom chu inhlan a nizie hrietzingna aiah sie rawh.
8. Hi bei hi chawlni zatin Israel thlahai aiawin LALPA hmaah sie zie hlak ding a nih, chu chu kumkhaw thuthlung a nih.
9. LALPA ta dinga meia thilhlan thienghlim tak laia Aron le a naupahai chanpuol a ni leiin, hmun thienghlimah an fak ding a nih" tiin.
10. Mi pakhat, a nu Israel mi, a pa Aigupta mi chu Israel mi pakhat leh riebuk tuolah an insuol a.
11. Israel nu naupa chun tongsie inphura Pathien hming a hrilsiet leiin ama chu Mosie kuomah an hung thuoi a. A nu hming chu Selomit a na, Dan chi-hnama mi Dibri naunu a nih.
12. LALPA thusuok an nghak sung po chu ripah an khum a.
13. Chun, LALPA chun Mosie kuomah,
14. "Tongsie inphurtu kha riebuk puo tieng thuoi suok ro. A hril hretu po poin a chungah kut thlak an ta, pung khawm po poin lungin deng raw hai se.
15. Israelhai kuomah hi thu hi hril rawh: Tu khom tongsie a Pathien inphurtu chun a maw phur a ta,
16. LALPA hming tongsie inphurtu chu sukhlum ngei ding a nih. Pungkhawmhaiin lungin deng hlum raw se. A rama pieng amanih ram dang mi amanih tu khom Pathien hming hrilsetu taphot chu sukhlum ding a nih.
17. " 'Tu khomin mihriem hringna a lak chun ama chu sukhlum ding a nih.
18. Mi dang ran sukhlumtu chun ran dangin a rul ding a nih, hringna chu hringnain.
19. Tu khomin a tuolbawmhai a sukhliem chun, a hliem dan chu ieng ang khom ni sien, a thaw dan ang chara a chunga thaw ve ding a nih:
20. ru tliek aiah ru tliek, mit aiah mit, ha aia ha. Mi a sukhliem chun ama khom sukhliem ve ding a nih.
21. Tu khom ran sukhlumtu chun ranin thung a ta, mihriem hringna latu ruok chu sukhlum ding a nih.
22. A ram mi le hnam dang mihai ta ding khomin dan thuhmun in nei ding a nih. Kei hi LALPA in Pathien chu ka nih' tiin" a ta.
23. Chuongchun, Mosie chun Israelhai chu a biek a, tongsie inphurtu chu khawhnawmah an thuoi a, lungin an deng hlum a. LALPAN Mosie kuoma thu a pek ang peiin Israelhai chun an thaw a.
←  Leviticus (24/27)  →