←  Leviticus (20/27)  →
1. LALPAN Mosie a biek a,
2. "Israel thlahai kuomah hieng thu hi hril rawh: 'Tu khom Israel thla laia mi amanih, ram dang mi Israel rama khawsa amanih, mani rila ra naupang, Moleke kuoma petu taphot chu sukhlum ngei ding a na, hi rama mihai hin lungin an deng hlum ding a nih.
3. Molek kuomah mani nau pe a, ka hmun thienghlim sukporche a, ka hming sukpawitu chunga chun kei khomin ka hmai suktur ka ta, a chipuihai laia inthokin sukbohmang ka tih.
4. Chun, hi rama mihaiin chuonga mani rila ra Molek kuoma petu thil thaw chu hmu naw ang ziezanga um a, an sukhlum naw chun,
5. chu mi le a sunghai chunga khom chun ka hmai suktur ka ta, a chipuihai lakah sat thlang ka ta, ama ang boka Molek kuoma inzortu po po chunga chun thaw bok ka tih.
6. " 'Rau ko thiemhai le dawithiemhai pan a, anni laka inzortu chunga chun ka hmai intur a ta, a chipuihai laka inthokin sukbohmang ka tih.
7. " 'Chuleiin, inhlan thienghlim unla, thienghlim takin um ro, LALPA in Pathien chu ka ni si a.
8. Ka thupekhai vongin zawm ro. In LALPA, sukthienghlimtu cheu chu ka ni si a.
9. " 'Tu khom mani nu le pa tongsie inphurtu chu sukhlum ngei ding a nih. A nu amani a pa amani tongsie inphurtu a na, a thisen maw chu ama lu chungah tlang a tih.
10. " 'Tu khomin mi dang nuhmei, a tuolbawmpa nuhmei a uiretpui chun, a uirepa le a uirenu chu an pahnia sukhlum ding an nih.
11. " 'Tu khomin a pa nuhmei a zalpui chun a pa a sukmuolpho a nih. Uirehai chu sukhlum ve ve ding an nih; an thisen maw chu an lu chungah tlang a tih.
12. " 'Tu khomin a monu a zalpui chun an pahnia sukhlum ding a nih. An thilthaw chu thil letling a na, an thisen maw chu an lu chungah tlang a tih.
13. " 'Pasalin nuhmei anga pasal dang a zalpui chun an pahniin thil tirdakum an thaw a nih. An pahniin sukhlum ve ve ding a nih; an thisen maw chu an lu chungah tlang a tih.
14. " 'Miin nufa nuhmeia a nei kop chun ritlona nasa tak a thaw a na, chuong ang ritlona chu nangni lai a um nawna dingin, an renga rawhlum ding an nih.
15. " 'Pasalin ran a rim chun ama chu sukhlum ding a na, ran khom chu that bok ding a nih.
16. " 'Nuhmeiin inpawlpui dinga ran a pan chun nuhmei le ran chu an pahniin that ro. Sukhlum ngei ngei ding an nih; an thisen maw chu an lu chungah tlang a tih.
17. " 'Miin a farnu,- a pa naunu amanih a nu naunu amani khom ni sien,-nuhmeia neia a zalpui chun thil inzakumthlak tak a ni leiin a chipuihai laia inthoka hnot suok ding a nih. A farnu a sukmuolphona maw chu phur a tih.
18. " 'Tu khomin nuhmeiin thla a pal laia zalpuia a pawl chun, a thla palna hnar chu hlim a, a nuhmei khomin a lo hawkpek a ni leiin an pahniin an chipuihai laia inthoka hnot suok ding an nih.
19. " 'I pa farnu amanih, i nu zuorpuinu amanih i zalpui ding a ni nawh, laichin hnai sukmuolphona a na, a maw chu in pahniin phur in tih.
20. " 'Miin a pate nuhmei a zalpui chun a pate a sukmuolpho a nih. An pahniin a maw phur an ta, nau boin thing an tih.
21. " 'Miin a unaupa nuhmei a neipek chun, thil tirdakum thawin a unaupa a sukmuolpho a nih. An pahniin nau boin thing an tih.
22. " 'Ka thuoina ding cheu ram, in chengna ding chun a'n luok suok nawna ding cheuin ka thupekhai vongin ka danhai zawm ro.
23. In hmaa ka hnot suok ding hnamhai ching dan angin hung khawsa ve naw ro. Hieng thil hi an thaw leiin a nih ka tirdak tawl chu.
24. Nangni kuoma ruok chu, 'An ram chu la chang in ta, nenetui le khuoizu luongna ram chu in rochung dingin la peng ka ti cheu' ka ti lem a ni kha. Kei hi LALPA in Pathien, hnam danghai laka ser hrangtu cheu chu ka nih.
25. Chuleiin, sa thieng le thieng lo, vate thieng le thieng lo in thlier hrang thiem ding a nih. Sa amanih, vate amanih le hnuoia invak taphot laia thieng loa ka siehaiin an sukporche ding cheu a ni nawh.
26. Ka ta dingin in thienghlim ding a nih, kei LALPA hi ka thienghlim si a; ka ta dinga hnam danghai laka ka ser hrang in nih.
27. "Nangni laia mi, a nuhmei a pasalin, rau ko thiem le dawithiem po po chu sukhlum vong ro. Lungin in deng hlum ding a nih. An thisen maw chu an lu chungah um a tih' ti bok rawh" tiin.
←  Leviticus (20/27)  →