←  Leviticus (16/27)  →
1. Aron naupa pahniin LALPA an va hnaia an thi pha hnung khan LALPA chun Mosie a biek a.
2. LALPA chun Mosie kuomah "I unaupa Aron hril la, puonzar sung, Hmun Thienghlim taka thuthlung bawm chunga zangaina thungphaa chun sumin ka hung inlar ding a ni leiin, a nuom hun hunah hung lut naw raw se, chuong naw chun thi rawi a tih
3. "Aronin hmun thienghlim sung a hung lut dan ding chu hieng ang hin a nih: suol thawina ding bawngchal tuoi le pumraw thilhlana ding beram chal a hung chawi ding a nih.
4. Puon zai inhmia siem zakuo thienghlim chu hak a ta, a saruok inkhumna ding puon zai inhmia siem kekorte bun a ta, cheizemin a kawng hren a ta, puon lukawm kawm bok a tih. Hieng hi silfen thienghlim a ni a, a hak hmain tui a'n sil hmasa zet ding a nih.
5. Israel sungkuoa inthokin an suol thawina dingin kelchal pahni le pumraw thilhlana dingin beram pakhat a lak ding a nih.
6. "Aron chun ama puola suol thawina dingin bawngchal hung inhlan a ta, ama le a sunghai ta dingin inremna siempek a tih.
7. Chu zoah kel pahni hung keiin Intuokna Puon ina chun LALPA hmaah hung thuoi a ta.
8. Chun, kel pahni chungchanga chun thum vawr a ta, pakhat chu LALPA chanpuol ning a ta, pakhat chu suol phurtub chanpuol ning a tih.
9. Aron chun LALPA chanpuol kel chu lang a ta, suol thawinain inhlan a tih.
10. Suol phurtu chanpuola tlu kel ruok chu LALPA hmaah a hringin hung thuoi a ta, inremna siemna dinga thlalera suol phur hmangtu dingin a hringa insuo ding a nih.
11. "Aron chun ama puola suol thawina bawngchal chu hung kei a ta, ama le a sunghai ta dingin inremna thilhlanah inhlan a ta, ama suol thawina bawngchal chu that a tih.
12. LALPA hmaa maichama inthokin mei lakna berbua chun meiling a sipin lang a ta, rimtui inhnik tak rawt dip thum hni leh puonzar sung tieng chun lutpui a ta,
13. a thi nawna dingin, rimtui chu LALPA hmaah meia chun phul a ta, rimtui khu inzam chun Thuthlung Bawm chunga zangaina thungpha chu tuom vel a tih.
14. Bawngchal thisen iemani zat chu lang a ta, a kutpar hmorin zangaina thungpha hma tieng chu theng a ta; chu zoah a kutpar hmor bokin a then chu zangaina thungpha chunga chun voi sari theng a tih.
15. "Chu zoa chun mipui ta dinga suol thawina thilhlanah kel chu that a ta, a thisen chu puonzar sung tieng chun chawi a ta, bawngchal thisen a thaw dan ang khan thawng a ta, zangaina thungpha chunga le a hma tieng chun theng a tih.
16. Chuong ang chun Israel thlahai inthieng nawna le helna leiin, an suolna chu ieng po khom ni sien, Hmun Thienghlim ta dingin inremna siem a ta; chuong ang bokin an inthieng nawna huol vela um Intuokna Puon in ta ding khomin inremna a siem bok ding a nih.
17. Ama le a sungkuo le Israel hnam pumpui ta dinga inremna siem dinga Hmun Thienghlima Aron a lut lai le a hung suok nawk hmakhat chun Intuokna Puon inah tukhom an um ding a ni nawh.
18. LALPA hmaah maichama chun hung a ta, chu taka ding chun inremna siem a ta, bawngchal thisen le kel thisen iemani zat chu lain maicham ki tina chun a velin tat a tih.
19. Chun, a kutpar hmorin thisen chu voi sari theng a ta, inthien a ta, Israel thlahai chu an inthieng nawna laka inthok chun sukthienghlim a tih.
20. "Chun, Hmun Thienghlim le Intuokna puon in le maicham ta dinga inremna a siem zo chun kel hring chu hung kei a ta,
21. a lu chunga chun a kut khing hnia innghatin, Israelhai ritlona, helna le suolna po po chu insam a ta, kel lu chunga chun innghat vong a ta, kel chu mawphurtu dinga ruot diem ta sa mi pakhat kuta chun pein thlaler tieng infetir a tih.
22. Kel chun an suolna po po chu thlaler hmun reah phur a ta, chu taka chun insuo hmang a tih.
23. "Chu zoah Aron chu Intuokna puon inah lut a ta, Hmun Thienghlim a lut laia a silfen inbelhai kha hlip a ta, chu taka chun maksan a tih.
24. Hmun Thienghlima chun insil a ta, a silfen pangngai inbel nawk a ta, hung suok a ta, ama puola pumraw thilhlan le mipui puola pumraw thilhlan chu inhlan a ta, ama le mipui ta dingin inremna chu siem a tih.
25. Chun, suol thawinaa thau chu maichamah raw bok a tih.
26. "Chun, suol phurtu kel inthlaa fe khan a silfenhai sawpa tui a'n sil zo hnungin riebukah a hung lut chauh ding a nih.
27. Inremna siemna dinga Hmun Thienghlima an thisen Aronin a chawi lut, suol thawina bawngchal le suol thawina kel ruok chu khawhnawma fepui ding a na, a vun hai, a sa hai le a ek hai chu raw ding a nih.
28. A rawtu chun a silfenhai sawp a ta, insil a ta, chu hnungah riebuk tieng hung inlawi thei a tih.
29. "Chun, hi hi in kumkhaw dan ding chu a nih: Thla sarina ni sawma chun ieng khom faa dawn loin, nangni le a ram mi reng amanih le ram dang mi nangni laia khawsahai khomin sin in thaw ding a ni nawh.
30. Hi ni hin nangni sukthienghlimna dingin in ta dingin inremna siem a ni ding a na, chuongchun LALPA hmaah in suolna po po laka chun hung thienghlim in tih.
31. In ta dingin Sabat, chawl tok tokna ni a na, ieng khom tawk naw ro, chu chu kumkhaw dan ding a nih.
32. Thiempu, a pa aia thiempu ni dinga hriek nal le namnghet chun inremna siem a ta, puon zai inhmia siem silfen thienghlim chu inbel a ta,
33. Hmun Thienghlim puola dingin inremna siem a ta; Intuokna Puon in le maicham puola dingin inremna siem a ta, thiempu le mipuihai puola dingin inremna siem bok a tih.
34. An suolna po po leia Israelhai ta dinga kum tin inremna voi khat siem zie ding ti hi kumkhaw thupek a nih" a ta. LALPAN thu a pek angin Mosie chun an thaw a.
←  Leviticus (16/27)  →