Leviticus (1/27)  →
1. LALPA chun Mosie a ko a,Intuokna puon ina inthokin a biek a.
2. "Israelhai kuomah hi thu hi hril rawh: 'Nangni lai tu khomin LALPA kuomah thil inhlan ding in hung chawi chun beram amanih bawng ruol laia mi amanih hung inhlan ro.
3. " 'Pumraw inthawinaa inhlan chu bawng a ni chun a chal tuoi, hmel hem lo a ni ngei ding a nih. LALPA ta dinga pom tlak a ni theina dingin Intuokna Puon in kot bulah hung inhlan raw se.
4. Pumraw inthawinaa thilhlan ran lu chunga chun kut innghat a ta, a ta dinga inremna siemtu dingin pompek ning a tih.
5. LALPA hmaah bawngchal tuoi chu that a ta, thiempu Aron naupahai chun a thisen lang an ta, Intuokna puon in kota maicham chu thisen chun theng an tih.
6. Pumraw thilhlan bawng chu a vun inhlip a ta, chan nawi a tih.
7. Thiempu Aron naupahai chun maichamah mei sem an ta, thing ti ding khom ngaituo bok an tih.
8. Chu zoah Aron naupa thiempuhai chun a sa le a lu le a thauhai chu maichama mei choka chun buk an tih.
9. Thiempu chun a sung le a kehai chu tuiin sawp fai a ta, maichamah rawng a tih. Chu chu mei hmanga pumraw thilhlan, LALPA ta dinga rim inhnik chu a nih.
10. "Pumraw thilhlan dinga a hung chawi chu a ran ruol laia mi beram amanih kel amanih a ni chun, a chal, hmel hem lo a ni ding a nih.
11. Maicham hmar tieng panga chun LALPA hmaah that a ta, Aron naupa thiempuhai chun ran thisen chu maicham sir tinah a velin the khum an tih.
12. Chun, a sa chu chan a ta, a lu le a thauhai leh maicham chunga chun thiempuin sieng a ta,
13. a sung le a kehai chu tuiin sawp fai a ta, chuonghai chu thiempuin hung chawi a ta, a rengin maichamah rawng a tih. Chu chu mei hmanga pumraw thilhlan, LALPA ta dinga rim inhnik chu a nih.
14. " 'Chun, LALPA ta dinga pumraw thilhlan chu vate a ni chun, vathu tuoi amanih parva tuoi amanih a ni ding a nih.
15. Thiempu chun maichamah hung chawi a ta, vate ring chu her bong a ta, maichamah rawng a ta, a thisen chu maicham sira chun infar kangtir a tih.
16. A ong le a hmul chu vut siena maicham sak tieng chun peihawn a tih.
17. A thlaah manin pot fai a ta, pot nawi si loin maichama meichoka chun rawng a tih. Chu chu mei hmanga pumraw thilhlan, LALPA ta dinga rim inhnik chu a nih.
      Leviticus (1/27)  →