←  Lamentations (5/5)    
1. Kan chunga thil tlunghai hi,Aw LALPA hung hre zing rawh.En ta, kan muolphozie hi!
2. Kan rochung kan ram hluohai,Hnam dangin an nei zo tah, Kan inhai khom hmel hriet loin.
3. Pa nei lo, fahra ang kan ni ta a,Kan nuhai khom hmeithai ang.
4. Kan tuisik tlan lai ngei khom,Kan inchawk hiel a ngai ta a,Thing khom kan inchawk a ngai.
5. Mi hnottuhan an mi'n thla nawh,Chauin sawl hle inlang khom,Kan chawl hadam thei si nawh.
6. Fak ding kan hmu theina din,Aigupta le Asuria kan bel a.
7. Kan pahan an lo thaw suol a,Anni an um ta si naw a,Keinin a maw kan tuor a nih.
8. Kan chungah bawi an inlal a,An kut a'nthoka mi san suok ding,Tu khom hlak an um si nawh.
9. Thlaler ram hmun ti-umah,Kawlhnam inlengna hmunah,Thi huomin bu kan zong a.
10. Tam khawsik mi not leiin,Kan pang thuk angin a sa.
11. Zion-ah kan nuhmeihai,Mihaiin an pawngsuol a,Judai ram khaw tinah hai,Kan nunghakhai an pawngsuol.
12. Lal nauhai hruiin an khai a,Upahai khom an inza nawh.
13. Bu rawtnaah tlangvalhai,Bu herin an sor kawng a,Naupanghan kat tang tangin,An thing ti ding an phur a.
14. Kul kotkhar bula thung hlak,Upahai an zam zo ta a,Tlangval hla sak pawl khomin,An hla sak an chawlsan tah.
15. Kan hlimna a chuoi zo a,Kan lam lusunah a'n chang a.
16. Kan lallukhum khum a tla a,Kan suol tlat bok si leiin,Kan chung a va pik de aw!
17. Hieng lei hin kan lung a se a,Kan mithai a'n thim zo tah.
18. Zion chu rausana umin,Sihalhai tuolchaina a'n chang tah.
19. Aw LALPA, chatuon Lal i na,I lalna chu suon tin dai a nih.
20. Ieng leia i mi theinghil zing?Ieng leia hi chen hi i mi maksan?
21. Nangin LALPA mi siemtharin,I kuom tieng mi thuoi kir rawh.Tiena kan hlim lai ni ang khan,Nangin mi tuoi thar nawk rawh-
22. Nangin mi hnawl letder aKan chunga i lungsenna kha,Dam thei lo a ni ngot naw chun.
←  Lamentations (5/5)