←  Lamentations (3/5)  →
1. A lungsenna hmoltum hnuoia,A'n tuortir dan hmutu ka nih.
2. Ama chun vara inthokin,Thimah a mi hnot lut a.
3. Ka chungah sunnithlakin,A kut a thlak ngat ngat a.
4. Ka taksa le ka vunhai khom,A suktawm zo vong ta a,Ka ruhai a vuok tliek a.
5. Khakna le harsatnain,Sir tinah an mi'n huol a.
6. Fam lo chang daih tah angin,Thimah a mi'n chengtir a.
7. Ka tlan suok thei nawna di'n,Dai a mi sakkhum vong a,Khaidiet rikin a mi thlung.
8. Santu ding ka ko khomin,Ka hnina a kharkhip vong.
9. Lung bumin ka lam a khar,Ka lampui a sukping vong.
10. Savom mi'n chan ang el le,Sakeibaknei intom ruk angin,
11. Lam a'nthok mi hnuk thlain,Santu nei loin a mi pot chen.
12. A thalngul chu a kuoi a,Kap dingin a mi tin a.
13. A thal bawma thal ngei chun,Ka lungah a kap tlang a.
14. Ka mihai nuizatbur kaiin,Sunnithlak hlain an mi ti-el.
15. Thil khain a mi hnaw sip a,A mit ringot a mi'n ba si.
16. Lungah ka ha tauh tlamin,Pilvut lai a mi sir ziel a;
17. Muongna a mi pek naw a,Hmuingil umzie ka theinghil tah.
18. "Ka ropuina a chuoi ta a,LALPA-a ka beiseina khom" Ka ti hlol el a'n tah hi!
19. Ka tuorna le vakvainahai,Mit hang khakziehai dam chu,Ienglai khomin ka hriet zing a,
20. Ka hriet chieng nasa leiin,Ka sungril a sukngui hlak.
21. Chuong sa chun, hi hi hrein,Beiseina ka nei nawk hlak:
22. Bohmang loa ei um el hi,LALPA zangaina lei a na,A lungsietna a tlol ngai nawh.
23. A thar pei hlak, tuk tinin,A ringumna a ropui si.
24. "Ka chanpuol LALPA a na,Ama chu nghak zing ka tih"Tiin ka'n hnem hlak a nih.
25. Amaa beiseina neitu,Ama nghaktu ta dingin,LALPA chu a tha a nih.
26. A sandamna beisei a,To zinga nghak hi a tha.
27. Tleirawl laia inthununnaRingkol bat hi a tha a nih.
28. LALPAN a'n battir leiin,To zingin um el raw se.
29. Pilvutah hmai phum sien la,Beisei ding a la um si.
30. A bieng bentu kuoma chun,Khing tieng khom dawpek sien la,Inzaknain sip raw se.
31. Mihriemhai hi kumkhuoin,LALPAN a pei thlak ngai nawh.
32. Lungngaina intlun sien khom,Lainatna a'n entir nawk hlak a,A hmangaina ropui chu,Ieng lai khom a re ngai nawh.
33. Hriem nauhai chunga tuorna,Lungngaina intlungtir hi,A nuomzawng a ni si nawh.
34. Saltanghai sirde amani dam,
35. Chunghnungtak hmaa mihriem,A chanvo hnawlpek amani dam,
36. Mi thu sukkhawhlopek dam hi,LALPAN a hmu naw am a ni?
37. LALPA thupek a ni naw chun,Tu thu am hlawtling a ta?
38. Sietna le thil tha tlunghai hi, Chunghnungtak baua inthokaSuok vong a ni naw am a ni?
39. Suol leia hremna tuor hi,Hringmi tu'm soisel thei ding?
40. Ei lam hrawhai bi chiengin,LALPA tieng kir nawk ei tiu.
41. Ei lungril le ei kuthai hi,Chung Pathien tieng phar suokin,
42. "Suol thawin kan lo hel a,Nangin i mi ngaidam naw a.
43. Lungsennaa inthuomin,Nangin i mi hnot thlur a,Lungsietna nei der loin,Dittawkin i mi suom tawl a.
44. Kan hnina tlung thei lo di'n.Sumin i'n tuom khum tlat a.
45. Hnamhai lai mi tirdak kai,Hmunhnokah i mi siem a.
46. Kan hmelmahan dit tawkin,An bau an mi phong khum a.
47. Thlaphangna le tlakkhurhai,Sietna le ramna kan tuor a.
48. Ka mihai siet tuok leiin,Vadung tui anga tamin,Ka mitthli a luong zoi zoi.
49. Ka mitthli hi chat loin,A la luong pei ding a nih,
50. Vana inthoka LALPAN,A mi zuk en hmakhat chun.
51. Jerusalem nuhai chan ding,Ka hmuin ka lung a zing.
52. San boa mi hmelmatuhan,Vate angin an mi ve a.
53. A hringin khuorkhurumah,Thi dingin an mi pei a,Lungin an mi deng mur mur.
54. Tuiin a mi chim pil a,Thi ngei dingin kan ngai a.
55. Khuorkhurum mong a'nthokin,LALPA, i hming ka lam a,
56. "Beidongin ka ko che hi,I na mi sitpek hram rawh"Tia ka hung hnina chu,I mi lo ngaithlakpek a,
57. Nang chun i mi hung hnai a,"Ti naw rawh" i hung ti kha.
58. Ka chungthuah aw LALPA,Nangma i hung inrol a,Ka hringna i'n tlan suok kha.
59. Ka chunga tha naw taka,An thaw danhai i hmu a,Ka'n dikna mi humpek rawh!
60. An phuba lak tum dan leAn mi phier inthuk dan khom,Nang chun i hmu vong si a.
61. An mi biek sisawnahai,An mi phierrukna po po,Aw LALPA i hriet vong a-
62. Sunnithlaka hmelmahan,An mi hrilsietna zozai chu.
63. En ta, an thung le ngir hi!An mi nuisawna hla naw chu,Khukpui dang hrim an nei nawh.
64. Aw LALPA, an phu ang le,An kut sinthaw ang peiin,Nangin thungrul tawl lem rawh.
65. An lungril sukmawkpek la,I tongsie phur raw hai se!
66. Lungsenin hnot thlur tawl la,Van hnuoia inthok hin LALPA,Anni chu sukbohmang rawh.
←  Lamentations (3/5)  →