←  Judges (15/21)  →
1. Chu hnung, bu sik hun lai hin Samson chun kel tuoi keiin a nuhmei zu kan dingin a fe a. "Ka nuhmei pindanah ka lut ding a nih" a ta, sienkhom a tarpu chun a phal naw a.
2. "I theida hle nia ka hriet leiin i ruolpa ka lo pek el an tah. A sangnu hi ama nekin a hmel a tha lem naw maw? A aiin nei lem el rawh" a ta.
3. Samson chun an kuomah, "Tuta tum hin chu Filistinhai poi tawk khom ni lang mi dem thei ta naw ni hai" a ta.
4. Chuongchun a suok a, sihal zathum a va man khawm a, a kop peiin an mei a suizom a, meiser a siem a, an meia chun a khit de a.
5. Meiser chu a raw chok a, sihalhai chu bu hmunah a'n suo a, buphal le bu la ngirhai chu, an oliv huon le grep huon chenin, a kang ta dur dur a.
6. "Tu thaw am a na?" ti Filistinhaiin an indon chun, "Timna khuoa mi pakhat makpa Samson thaw a nih; a tarpuin a nuhmei a lakpek a, a ruolpa a lo pek lei a nih" an ta. Filistinhai chun an pafain an hang raw hlum a.
7. Samson chun an kuomah, "Hienga in thaw si hin chu phuba ka lak hma chun chawl naw ning" a ta
8. Anni chu a bei a, a that teu a, a fe thlak a, Etam lungpuia puka chun a um a.
9. Filistinhai chu an inthok tung a, Judai rama chun an hang inkul a, Lehi hmun chen an inzar phei a.
10. Judai rama mihai chun, "Ieng leia keini mi bei dinga in hung inthok am a na?" an ta. Anni chun, "Samson man dinga hung inthok kan nih; kan chunga a thaw ang chara thaw ve kan tum a nih" an ta.
11. Chu phing leh Juda mi sangthum chu Etam lungpuia chun an zu fe a, Samson kuomah, "Filistinhai hi eini chunga roreltu an nih ti i hriet naw maw? Kan chungah ieng top am a na i thaw ta hi?" an ta. Ama chun, "Ka chunga an thaw ang charin an chungah ka thaw ve a ni kha" a ta.
12. Anni chun, "Khuop a, Filistinhai kuta inhlan ding chein kan hung a nih" an ta. Samson chun, "Nangni chun mi sukhlum lo dingin ka kuomah inkham phot ro" a ta.
13. Anni chun, "Sukhlum lo e, sienkhom khuop kan ti che a, an kutah kan pek ding che a nih, that chu that teu nawng kan ti che" an ta. Chuongchun, hruol thar pahniin an khuop a, lungpui kaw kara inthok chun an hung thuoi suok a.
14. Lehi hmun an tlung chun Filistinhaiin an lo tuok a, an khek dur dur a. LALPA Thlarau chu Samson chungah thilthawtheinain a hung tlung a, a ban an zemna hrui hruol chu ziza zai, meia raw angin a kuta inthok chun a hung til thla tak tak a.
15. Sabengtung khak ru tharlam a hmu a, a lak a, chu chun mi sangkhat a vuok hlum a.
16. Samson chun,"Sabengtung khak ru hmangin,Sabengtungin ka siem tawl a,Sabengtung khak ru hmangin,Mi sangkhat ka vuok hlum"a ta.
17. A hril zo chun sabengtung ru chu a dehawn a; chu hmun chu Ramat Lehi (Khak ru Tlang) tiin an inbuk a.
18. Samson chu a dang a char em leiin, "Nangin i siehlaw kut hi hmangin ropui takin i mi san suok a. Tu hin dangchara thiin sertan lohai kutah ka lut el dim a ni?" tiin LALPA a ko a.
19. Lehi hmuna khur chu a hung kak phut a, chu taka chun tui a hung inchik suok a. Samson chun a dawn a, a tha ngai putin a hung har nawk ta a. Chu tui hnar hmun chu En Hakore an inbuk a, Lehi hmunah a la um zing.
20. Filistinhai vanglaiin Samson chun Israelhai chu kum sawmhni a thuoi a nih.
←  Judges (15/21)  →