←  John (2/21)  →
1. A ni thum ni chun Galili ram
2. Isu le a zirtirhai khom molawma chun an fiel a.
3. Uoiin an indai ta naw leiin Isu nu chun a kuomah, "Uoiin an tlasam tah ie" a ta.
4. Isu chun, "Nuhmei, chu chu nangma le keima lungkham ding am a ni? Ka hun a la tlung hri nawh" a ta.
5. A nu chun rongbawltuhai kuomah, "A hril taphot ang chun thaw pei ro" a ta.
6. Chu hmuna chun Judahai inthien dan anga insawpna ding lung tuibel paruk, litar sawmsari panga le za sawmpasari inkar vel keng seng, an intung a.
7. Isu chun, "Tuibel po poa khan tui sung sip ro" a ta. Arengin an sung sip hmar a.
8. Chuongchun an kuomah, "Thal unla, tucha hotu kuomah chawi ro" a ta, a ti ang chun an thaw a.
9. Tui, uoiina inchang chu tucha hotu chun a hang intem a, khaw laia inthoka an hung lak am ti a hriet naw a, tui thaltuhai ruok chun an hriet a.
10. Chuongchun, moneitu chu a ko a, "Mi tinin an uoiin nei tha an sem hmasa phot a, an dawn rawn deuh pha uoiin naran an sem hlak kha a na, nang ruok chun tu chen hin uoiin tha tak i la nei rop a!" a ta.
11. Hi inchikna thilmak, Isun a thaw hmasa tak hi Galili ram Kana khuoa a thaw a nih. Chuong ang chun a ropuizie a'n langtir a, a zirtirhai chun ama chu an ring tah a.
12. Chu hnung chun Isu chu a nu leh, a unauhai le a zirtirhai leh Kapernaum-ah an zu fe a, chu taka chun ni iemani zat an cham a.
13. Judahai Fekan Kut a hung hnai chun Isu chu Jerusalemah a hang fe a.
14. Tempul tuolzawla bawng dam, beram dam le parva dam zortuhai le dawkan kila inthung tangka thlengtuhai chu a hmu a.
15. Chuongchun, hruolin vuokna a siem a, beram le ranhai chu tempul huonga inthokin a hawl dok vong a; tangka thlengtuhai tangka thir chu a the dar a, an dawkanhai a nam thluk a.
16. Parva zortuhai kuoma chun, "Hieng thilhai hi la suok ro, ka Pa in hi sumdawngna hmunah siem naw ro" a ta.
17. A zirtirhai chun, "I in ta dinga thahnem ka ngainan a mi lem zo" ti zieka lo um chu an hriet suok nawk tah a.
18. Chu phing leh Judahai chun, "Hieng thil hi thaw dingin thuneina i nei ti inchikna ieng am i mi'n entir thei a?" tiin an indon a.
19. Isun, "Hi tempul hi thiek unla, ni thum sung indin nawk ka tih" tiin a don a.
20. Judahai chun, "Hi tempul bawlna hin kum sawmli paruk zet a lak a, nangin ni thum sungin i bawl ding maw?" an ta.
21. Aman tempul a hril chu a taksa a ni lem dai si a.
22. Thinaa inthoka a tho nawk hnungin a zirtirhaiin a thu hril chu an hriet suok vong vong a, Pathien lekha thu le Isu thu hril chu an ring tah a.
23. Fekan Kut hmanga Jerusalema a cham sunga inchikna thilmak a thawhai hmutu mi tam takin ama chu an ring tah a.
24. Nisienlakhom, Isu chun anni rawi chu a nel el nawh, mi po po a hriet chieng leiin.
25. Mi chanchin tu khomin an hril a ngai nawh, mihriem lungrila um chu a hriet vong si a.
←  John (2/21)  →