←  John (12/21)  →
1. Fekan Kut hma ni ruka chun mithi a keitho Lazar umna khuo Bethaniah Isu a hung tlung a.
2. Chu taka chun ama hmingin zanbu an buotsai a, Marthain rong a bawl a, dawkana thlaithleng kilpuituhai lai chun Lazar khom a thang a.
3. Mari chun Nard hriek hlang hlak rimtui, to tak el, bur khatp a hung chawi a, hriek chun Isu ke chulin, a samin a ke chu a hruk a. Hriek rimtui rim chun in chu a sip rum rum a.
4. A zirtir laia pakhat, Juda Iskariot, ama inmantirtu ding chun,
5. "Hi hriek rimtui hi zor a, mi retheihai kuomah ieng dinga a pek lem el naw? A man hlak puitling kum khat hlaw hu zet a ni si a!" tiin a lo soisel a.
6. Mi retheihai a'n voi leia chu chu a hril a ni nawh; rukru a na, tangka ip koltu a na, chu ipa um chu a lak hlak lei a nih.
7. Isu chun, "Tosan raw khai! Ka ruong vui nia dingin hi rimtui hi a lo khek hrim a nih.
8. Mi retheihai chu ieng lai khom nangni lai an um zing an nawm, kei ruok chu in kuomah um zing naw ning" a ta.
9. Bethani khuoah Isu a um ti Juda mipuiin an hriet chun hmu dingin an fe a; Isu chauh ni loin, mithi a keitho Lazar khom chu hmu an nuom bok a.
10. Chuleiin, thiempu lalhai chun Lazar khom sukhlum tumin an phierruk a,
11. ama leia Juda tam takin Isu chu ringa a tieng an pakai tak leiin.
12. A zinga chun kuta hung mipui tam takin Jerusalem panin Isu a hung ti an hriet a.
13. Tum kau chawiin ama hmuok dingin an hung inthok suok a,Hosana,Lalpa hminga hung chu,A ham a tha;Israel Lal hung chu,A ham a tha tiin an khek thuop thuop a.
14. Isun sabengtung tuoi chu a hmu a, a chungah a chuong a,
15. Pathien lekha thua"Ti naw, aw Zion naunu,En ta, i Lal a hung,Sabengtung tuoi chunga chuongin"tia ziek ang khan.
16. Chuong thil chu a tir chun a zirtirhan an hriet thiem nawh. Isu chawimawia a um hnungin a chungthu chuong ang chun ziek a ni leia an lo thaw a nih ti an hung hriet tah a.
17. Thlana inthoka Lazar a ko suok le mithi laia inthoka a keitho tuma um ve mipuihai khan chu thu chu an puong dar pei bok a.
18. Chu inchikna thilmak chu a thaw ti an hriet leiin mipui chun ama chu an lo hmuok a nih.
19. Farisaihai chun, "En ta u, ieng khom ei law thei naw chu a ni hi! En hman ro, khawvelin ama an zui tah hi" an inti tuo a.
20. Pathien be dinga kuta hang fehai lai chun Grik mi tuhai amanih an thang ve a.
21. Anni chu Galili rama Bethesaida khuoa mi Filip kuoma chun an hung a, "Pu, Isu kan hmu nuom" tiin an ngen a.
22. Filip chun Andri a hril a, an pahni chun Isu an va hril a.
23. Isun an kuomah, "Mihriem Naupa hi chawimawia a um hun chu a tlung tah.
24. Thudik tak ka hril cheu hi, bu mal khom hnuoiah a tla a, a thi zet naw chun, bu chi mal chauin a um zing hlak a, a thi ruok chun ra tam tak a'n suo hlak.
25. Tu khom mani nun thlakhlatu chun a chan hlak a, tu khom hi khawvela mani nun theidatu chun vong zing a ta, chatuon hringna nei bok a tih.
26. Tu khomin ka rong a bawl chun mi zui raw se, ka umna naah ka rongbawltu khom um a tih. Tu khom ka rong bawltu chu ka Pain chawimawi a tih.
27. "Tuhin ka lungril a lungzing hle a, ieng am hril tang ka ta? 'Pa, hi hun hi mi'n pumpeltir lul rawh' ka ti ding am a ni? Ti lo e! Hi lei taka hi hun hi hung tlung ka nih.
28. , Aw Pa, i hming chawimawi rawh" a ta. Chuongchun, vana inthokin rawl a hung suok a, "Ka chawimawi tah, chawimawi pei ka tih" tiin.
29. Chu taka ngir ve mipuiin rawl chu an hrietin, "Vaninrum a nih" an ta, a thenin "Vantirkoin a biek a nih" an ti bok a.
30. Isu chun an kuomah, "Chu rawl chu ka ta dinga suok a ni nawh, nangni ta ding a ni lem.
31. Tu hi khawvel chungthu rel lai a na, tuhin hi khawvel lal hi hnot suok ning a tih.
32. Hnuoia inthoka khai kanga ka um pha, mi po po keima tieng hip ka tih" a ta.
33. Chu chu ieng angin am a thi ding ti inentirna dinga a hril a nih.
34. Mipui chun, "Krista chu kumkhuoa um zing ding a ni thu Dan lekhabua inthokin kan hriet, ieng leia nangin, 'Mihriem Naupa chu khai kangin um a tih' i ti am a na? Chu Mihriem Naupa chu tu'm a na?" tiin an indon a.
35. Isun an kuomah, "Var hi sawt naw te nangni lai a la um hri ding a nih. Var in la nei sung hin leng ro, thimin a nang hma cheu hin; thima leng chun a fena chin a hriet si nawh.
36. Var in la nei sung hin var hi ring ro, var nauhai in ni theina dingin" a ta. Chuong thu chu a hril zoin a fe hmang ta daih a, an hmu thei nawna dingin an bi hmang a.
37. An mit hmu ngeiah chuong ang inchikna thilmak chu thaw sienkhom ama chu an ring chuong si nawh.
38. Zawlnei Isaiin,"Lalpa, kan thucha tuin am a ring a?Lalpa kut khom tu kuom am a'n lang a?"tia a hril kha a hung tlung kimna ding a nih.
39. Hi lei hin an ring thei naw a nih. Isai bokin hieng hin a lo hril kha:
40. "Aman an mit a sukdel a,An lungril a sukchawlol a,An mitin an hmu nawna ding leLungrila an hriet thiem nawna dingin;Chuong naw chun ngha kir an ta,Ka sukdam tawl el ding a ni si a."
41. Isaiin a ropuizie a hmu chieng leiin chuong thu chu a hril a nih.
42. Chuong sa khom chun mi tam takin, hotuhai laia mi chen khomin, Isu an ring tah a; amiruokchu, Farisaihai leia sunagoga hnong an inlau leiin, an hril lang ngam si nawh.
43. Pathien inpak hlaw nekin mihriem inpak ni chu an hlut lem si a.
44. Isu chu inring takin a khek a, "Tu khom a mi ring chu kei mi ring ni loin a mi tirtu ring a ni lem.
45. Tu khom a mi hmu chu a mi tirtu hmu a nih.
46. entu dingin khawvelah ka hung a nih, a mi ring taphot chu thima a'n leng nawna dingin.
47. Tu khom ka thu hrea awi nawtu chu keiin thiem naw ka'n changtir nawh, khawvel thiem naw inchangtir dinga hung ka ni nawh, khawvel sandam dinga hung ka ni lem.
48. Tu khom mi hnawl a, ka thu hrilhai pom nawtu chun a chungthu relpektu ding pakhat a nei. Ka thu hril ngei hi ni kin nia thiemnaw chang dinga a chungthu relpektu ding chu ning a tih.
49. Keima phuokfawm ka hril naw a, ka hril ding le ka tong dan ding chu Pa ngeiin a mi pek lem a nih.
50. A thupek chu chatuon hringna intluntu a nih ti ka hriet. Chuleiin, ka Pain hril dinga a mi ti ang chu ka hril el a nih" a ta.
←  John (12/21)  →