←  Job (8/42)  →

---

1.

Suha mi Bildad chun hieng hin a dona:

2.

"Ieng chen am hieng thu hi i hril ding? I thu hlak thlipui angin a na si.

3.

Pathienin ro a rel suol hlak maw?Iengkimthawtheiin thudik,A hem kawi hlak hrim am a ni?

4.

I nauhai a chungah an suol leiin,A hremna chu a'n tuortir el a nih.

5.

Sienkhom Pathien chu zong a,Iengkimthawthei chu hni a,

6.

Thienghlim le ngila i um chun,I ta dingin hung tho suok a ta,I ninaah tungding nawk a ti che.

7.

Mawl taka intan ni la khom,I tawpna tieng hmuingil a tih.

8.

Thang hluihai kha indon la,An pipu tonhriet chu ngaiven rawh.

9.

Zani ela pieng ei ni leiin,Thil ieng khom hriet ei nei naw a,Hnuoia ei um sung hlak hi,Hlimthla ang chauh a ni si.

10.

An hriethai hril an ti che a,Pipu varna thu zirtir an ti che.

11.

Duma naw phairuong a to hlak maw?Tui hulnaah phaipheng a tha hlak maw?

12.

An par zing lai, sat hun hmain,Hlo dang rop hma'n an tlep thla hlak.

13.

Pathien theinghiltu lampui chu,Chuong ang chu a ni vong a,Pathien nei lo beiseina chu,Chuong ang chun bohmang a tih.

14.

A'n nghatna chu a derdep a,A ringsan chu aium ril ang a nih.

15.

Aium ril chu a'n nghai a, Nisienlakhom a'n tan nghal a,A'n tul a, a dawl zo si nawh.

16.

Ni hmu le tui dong tha thing,Huona zung inzam dar angin,Mi rilo chu a'n thang hlut a,

17.

Lung hmuna hai a'n zam dar a,Lung kuo kara hai a'n zam lut a.

18.

Sienkhom, a bul phawi a ni pha,A mawngna hmun ngei chun hnawlin,"Ka hmu ngai naw che" a ti el hlak.

19.

Chu chu a tawpna chu a na,A hmunah a dang an hung to hlak.

20.

"Pathien chun dem kai lohai,Tu khom a hnawl ngai naw a,Thil suol thawtuhai kut khom,A sukhrat ngai hrim hrim nawh.

21.

I bau chu innuinain,I hmur chu hlimna hlain,La sung sip nawk ngei a tih.

22.

Nangma theidatuhai chu,Muolphona insiltir a ta,Mi suol puon in ngir ta naw nih."

---

←  Job (8/42)  →