←  Job (41/42)  →
1. "Ngakuoiin leviathano i kuoi dok zo ding?Hruolin a lei i khuop de thei ding?
2. A hnarah hruihruola thlungin,A orah ngakuoiin i thil tlang thei ding?
3. Ngilnei dingin a ngen ding che?Hoihawm takin a biek ding che?
4. Kumkhuoa i rongbawltu ni dingin,A remti i ring hrim hrim am?
5. Vate anga vai ngamin,I naunu i'n tlaitir ngam ding?
6. Sumdawnghan an hung dot ding che?An dawrah an zor i ring am?
7. A vunah thal a'n bur thei ding?A luah thal kibarin a kap tlang ding?
8. A chungah kut i thlak vai chun,Inbei nasa hleng in ta,Thaw nawk ta ngai naw ti nih.
9. Hne beisei chu thilthlawn a na,I hmu ruolin tlawm nghal i tih.
10. Cho ngam khopa rorum an um nawh.Ka hmaa lem chu tu am ngir ngam ding?
11. Thin nawk dinga tu am thil mi pe?Van hnuoia thil iengkim hi ka ta a nih.
12. "A fuke, hratzie le pien hmang khom,Hril hmai chi hrim a ni nawh.
13. Tuin am a vun thuo khok thei an ta?Tuin am a hmurah thirbar inbuk an ta?
14. Tuin am a ha tibaiuma inhuol, A bau chu pur ngam lul an ta?
15. A vun inpawthuo chu a phaw a na,
16. Boruok lut thei lo khopa phui a na,
17. An inpawthuo thlap vong leiin,A karah thil a lut thei nawh.
18. A hang insim chu a var phut a,A mit chu kawl angin a sen rum a,
19. A bauah meichok a suok hlut hlut a,Meisi angin an intek uoi uoi a.
20. Phairuong tawl thinga hmang a,Sa belpui suong hlut hlut angin,A hnarah meikhu a suok lui lui a.
21. A thuokin meihol a mut ling a,A baua inthokin meichok a suok a.
22. A ringah a hratna a um a,A fena photah mi a sukthlabar a.
23. A taksa inhrolin a muk a,A thau innemna lai a um nawh.
24. A awmbawr lung sakhat ang chu,Bu rawtna lung anga chang a nih.
25. A hung inthok suok meu chun,Pasalthahai khom an thlabar a,A tawk hmain an tlan se hlak.
26. Kawlhnama sat a poisa naw a,Fei le thal zum a poisa bok nawh.
27. Thir chu bupawl angin a ngai a,Dar chu thing hmon tah ang chauin.
28. Thalin a hnot zam naw a,Virvoma deng lem lem chu,Bu sia deng ang lekah a ngai.
29. Hmol chu bupawl angin a ngai a,Fei khaw vungin a nui a sukza chauh.
30. A phing vun tuomtu phuhlip chu,Bel koi har ngei tak ang vong a na,Chirdieka a fena sulhnu chu,Bu chilna khawla hrut ang a nih.
31. Belpui intlok ang but butin,Li ril khom a suktlok but but a,Sahriek bur thin ang elin,Tuipui khom a nok phul hlak.
32. A fena hnuhma a eng phut a,Tuipui huom chu a var sur hlak.
33. Ama anga titna hrim nei lo,Hnuoi chunga hin an um nawh.
34. Insuklien po po a hnuoi en vong a,Insuklulinghai lal a nih."
←  Job (41/42)  →