←  Job (33/42)  →
1. "Joba, tuhin ka thu hi ngaithla la,Ka hril taphot hi inchik dap rawh.
2. Ka bau ka phong ding a na,Ka hril ding ka lei hmawrah a um.
3. Lungril ngil takin hril ka ta,Ka hril ding hi thudik vong a nih.
4. Mi siemtu chu Pathien Thlarau a na,Hringna mi petu chu Iengkimthawthei a nih.
5. I mi don thei phot chun mi don la,Thang khaw la, mi hmason rawh.
6. Pathien hmaa chu nang ang boka,Pila inthoka lak suok ka ni ve.
7. Huphurin mi ti naw la,Ka kut thlak khom na naw nih.
8. "Ka hrieta ngei i hril takluo a,I thu hrilhai kha ka hriet chieng:
9. Ka'n thieng a, poi ka tawk naw a,Bawsietna lakah ka fihlim;
10. Sienkhom Pathienin suolah a mi ngai a,Hmelma enin a mi en a,
11. Ka keah kol a mi'n buntir a,Ka fena taphot a sui dap' i ti kha.
12. "Sienkhom hi hi ka hril che,Hi thua hin i hril indik nawh,Thi thei mihriemhai nekin,Pathien chu a ropui lem.
13. 'Mihriem thu a donsak nawh' tiin,Ieng leia ama i'n tum am i na?
14. Miin man phak naw sien khom,Pathien chun kong hrang hrangin, Mihriem kuomah thu a hril hlak.
15. Khum laizawlah zanmu,Inhnik taka a tuo rem laiin, A zan mangah a'n lar a,
16. A na bulah a biekruk a,Tium tlung dinghai hrillawkin,A sukthlabar hlak a,
17. A thil suol thaw inlamlettir a,Chapona lakah veng him a,
18. Thlana a liem ding chel kir a,Kawlhnama a boral nawna dingin.
19. A khumah natnain a thunun a,Chawl loin a ruha'n an chip a.
20. Bu duna hrim hrim a nei naw a,Bu inhnikin a luok a suksuok a.
21. A taksa a hung zur tiel tiel a,A ru khat chauh a hung ni ta a.
22. Thlan ko tlang a hung hnai a,Thina palaihai umna hmun chu.
23. "Mi chu a'n dikzie puongtu ding,Vantirko sangkhat lai pakhat bek,Hrilpuitu ding um chu ni sien,
24. A chungah ama chu zangaiin,'Thi loin insuo zalen ta ro,A'n tlanna ding ka hmu tah' ti sien,
25. Naupang anga a pang dawngin,Tleirawl angin hung intuoi thar a tih.
26. A tongtaina Pathienin don a ta,Hlim takin lo lawm lut a ta,Felna hmunah hlangkai nawk a tih.
27. Chuongchun, mihai kuomah hungin,'Suolin thil indik ka sukkhawhlo a,Sienkhom ka phu anga mi thung loin,
28. Ka nun varah inlengtir dingin,Thlana liem ding a mi san suok' Tiin hung hril a tih.
29. Hieng hi Pathienin mihriem chungah,Voi hni voi thum dam chen a thaw hlak,
30. Thlana liem ding sanhim a,Hringna vara a leng theina dingin.
31. "Chuleiin Joba, hieng thil hi inchik la,Mi ngaithla la, hril zom pei ka ti che.
32. Hril ding i nei a ni chun hril la,Thiem i chang ngei ka ditpui che leiin,I thuhai chu lo ngaithlang ka tih.
33. I nei naw chun to tokin ngaithla la,Varna thu inchuktir ka ti che."
←  Job (33/42)  →