←  Job (27/42)  →
1. Joba chun a hril zom pei a:
2. "Ka thiem anga thiem mi'n changtir lo a,Ka thlarau suklungngaitu Pathien,Iengkimthawthei salin thu ka tiem:
3. Ka sungah hringna a la cham sung,Ka hnarah Pathien thuok a cham sung chun,
4. Ka hmurin ritlona thu hril naw ni a,Ka leiin hlemna thu hril bok naw nih.
5. Ka thi hma khat chu in indik ti,Pom ngai naw hrim hrim ka ta,Ka'n dikna hi inphat ngai naw ning.
6. Ka felna chu vong tlat ka ta,Inthla ngai hrim hrim naw ning;Ka dam sung ka sie le tha hrietnain,Thiem naw mi'n chang ngai naw nih.
7. "Ka hmelma chu mi rilo ang ni sien,Mi beitu chu mi suol ang ni raw se.
8. Pathien nei lo chu sat thlaka uma,A hringna lakpek a ni pha chun,Ieng am beisei ding a nei a?
9. Beidongna'n a nangching pha,Pathienin a kona ngaithlang a ti?
10. Iengkimthawtheia chun hlim a ti?Ieng lai khomin Pathien ko a ti?
11. "Pathien hratzie zirtir ka ti cheu a,Iengkimthawthei lampui chu ip naw ning.
12. Nangni ngeiin in hmu vong ta si a,Ieng dinga hmang lo in la hril zing am?
13. k"Pathienin mi rilo chana a ruot,Neksawrtuin Iengkimthawthei laka A dong ding chu hi hi a nih:
14. Nau a hau leh kawlhnam tuor rawn an ta,A thlaha'n bu fak khop hmu naw ni hai.
15. A la dam sunhai chu hriin thing an ta,An nuhmeihai khomin sun naw ni hai.
16. Pilvut anga tangkaruo hui khawmin,Pil angin silfen deng bum hai sien khom,
17. Silfen chu mi felhan nei an ta,A tangkaruo khawl khawmhai chu,Poi tawk lohaiin insem an tih.
18. A in bawl chu aium ril ang chauh a na,Vengtu thamte daw ang chauh a nih.
19. Mi rilo chu hausa takin a zal a, Sienkhom zing a tho ruok chun,A hausakna chu um ta naw nih.
20. Thlaphangnan tui lien angin a chim a,Thlipuiin zanah a fen hmang dai a.
21. Sak thliin a len hmang dai a,A umnaa inthokin a nuoi bo a.
22. Za ngai der loin a nuoi a,A thilthawtheina hmaa chun,Pai chon chonin a tlansie a.
23. Nuisawin kut a ben khum a,A hmuna inthok a len hmang hlak.
←  Job (27/42)  →