←  Job (11/42)  →

---

1.

Chun, Naamat mi Zofar chun hieng hin a don a:

2.

"I thu vuok thlak zozaihai chu,Don lo le let thlak lo chi am a ni?

3.

I tong tam lei elin mihaiin,Tosan ding chein i ring maw?Khanga mi i hang nuisaw khan,Hal tuok loa suok i'n ring maw?

4.

Ka ring dan hi a fel fai a,I mithmuah ka thienghlim'Tiin Pathien kuomah i hril a.

5.

Pathien chu hung tong suokin,Hung kalin kawk sienla che,Ka va hang ti ngei de aw!

6.

A varna thuruk hril a ti che,Varna chun thuo tam a nei si a.Pathienin i suol phua nasain,A la hrem naw che ti hre rawh.

7.

"Pathien inthukzie i paw zo ding?Iengkimthawthei thaw thei chin,I dap suok zo ding am a ni?

8.

Van neka insang lem a na,Ieng tin am i thaw ta ding?Seol neka inthuk lem a na,Ieng tin am i hriet phak ta ding?

9.

Hnuoi nekin a sei lem a,Tuifinriet nekin a lien lem bok.

10.

Tang inah hung khum sien che,I chungthu reltu dingin,Roreltuhai khawm sien la,Tuin am khap thei a ta?

11.

Mi hmanglohai a hriet a,Khawhlona a hmu changin,A ngaitha ding am a ni?

12.

Ram sabengtung hi mihriema A pieng hun a tlung hma khat,Mi hmanglo chun hrietthiemna,Nei phak ngai hrim hrim naw nih.

13.

"Sienkhom i lungril pe a,Ama tieng ban i phar chun,

14.

I kuta suol chu pei hawn a,I puon ina a cheng i khap chun,

15.

Hmai tim loin dak suok i ta,Ti loin ngir chang tang i tih.

16.

I buoinahai theinghil i ta,Tui luong ral angin ngai tang i tih.

17.

I nun sunchang nekin var a ta,Thim chu vartienah inchang a tih.

18.

Beiseinaah i'n nghat ta leiin,I thla khom muong tang a ta,A nih, hang ngha vel i ta,Muongleiah chawl tang i tih.

19.

Tu khom ti ding nei ta loin,Zanmu intuo tang i ta,I dopah mi hung lut tang an tih.

20.

Mi rilohai mit chu invai a ta,Tlan suokna lam hmu naw ni a,An nghak tak chu thi ning a tih."

---

←  Job (11/42)  →