←  Hosea (10/14)  →

---

1.

Israel chu grep inbuk tha tak,Kur luoia ra ang a ni hlak.A hung ra rawn ang peiin,Maicham a siem rawn pei a;A ram hmuingil ang peiin,Lung ser lim a'n din rawn a.

2.

A lungril inhlemnan a sip a,Thiemnaw arbawm phur a tih.An maichamhai sukchim ka ta,An lung biekhai suksieng a tih.

3.

LALPA kan ti naw leiin,Lal kan nei ta naw a nih;Lal nei khom ni hrim inlang,Iem a mi thawpek thei ding?'Tiin anni chun la hril an tih.

4.

Thu tam tak an intiem a,Khelin thu an inkham a,Mihai thu an thlungpui a.Chuleiin, leilet indur a,Hnamtur a to rawn angin,Thubuoi a suok rawn lem si.

5.

Samaria chenghai chu,Beth Avena bawngte lim leiin,Thlaphang takin an um a;Mipuihai chun an sun a,Thiempuhai an tap inrum a,An ropuina milim chu,Lak hmanga a um leiin.

6.

Milim chu Asuria tieng,Lal tak kuoma pek dingin,An fe hmangpui ding a nih.Efraim chu inzak a ta,Israel chun a thing milim,La muolphopui ngei a tih.

7.

Tuiin hnawl a len angin,Samaria lal fen hmang an tih.

8.

Beth Avena bawlhmun sanghai,Israelhai suol thawna hmun chu,Suksiet la ni vong a tih.Hling bukin bawm khum an ta,Mihai chun tlanghai kuomah,"Mi sin khum rawh" ting an ta,Muolhai kuoma khom mihan "Mi del rawh" la ting an tih.

9.

Gibea khuoa i suol ang khan,Aw Israel, i suol zom zar zar a,Inthlakthleng hrim i tum nawh.Gibea thil suol thawtuhai kha,Indonan a nangching ni lo maw?

10.

Ka nuom pha leh hrem ka ta,Thuo hnia an suol leiin,Hrengthir inbuntir dingin,Hnam tinhai hawr khawm ka tih.

11.

Efraim chu bawngla zirtir tah,Bu chil chak tak ang hi a na,Inrim nawk zuola sor dingin,A thlukvum mawiah ringkol,Keiin inbattir ka tih.Efraim in langkawn hnuk a ta,Langkumah Juda hmang ka ta,Jakob chun pil tuk nawi a tih.

12.

In ta din ram thar inlet unla,Felna chi chu tu unla,Chuoi lo hmangaina sik ro.In kuomah LALPA hung a,Felna hung insurtir dingin,Ama chu zong hun a nih.

13.

Sienkhom ritlona in tu a,Khawlona ra in sik a,In khelhlip ra in fak a.Nangni hratna chu ring a,In sipai hau in ringsan leiin,

14.

Ralin hung bei an ti cheu a,In kulhai sukchim vong an ta,Beth Arbel a hung bei ni a,Salmanin a suksiet ang khan,Nu le nauhai chu hnuoi vuoknan,An la hmang ding a ni si a.

15.

Nangni Bethela chenghai,In rilo bek bek leiin, Chuong chu in chungah tlung a ta,Zingkar indona a'n tran pha leh,Israel lal chu se vong a tih.

---

←  Hosea (10/14)  →