←  Hebrews (4/13)  →
1. Chuleiin, a chawlnaa lut theina thutiem a la ngir zing sung hin nangni laia mi tu khom lut dinga inhnu taluoa inngai in um pal nawna dingin fimkhur ro.
2. An kuoma Chanchin Tha hril a ni ang bok khan eini kuoma khom hril a ni ve a, sienkhom an thu hriet chu ringa an zawm si naw leiin an sawtpui der nawh.
3. Eini ringtuhai hi a chawlnaa lut tahai chu ei nih. Pathienin hnuoi le van a siem zo khan a sin a chawlsana chu, "Lungsena ka'n kham ang khan,Ka chawlnaah lut naw ni hai"a la ti zing a nih.
4. Ni sari ni thua chun, "Pathienin a sinthaw po po ni sari niin a chawlsan tah a" tiin khaw lai amanih ziek a ni kha.
5. A chunga thu ei tarlanga khan "Ka chawlnaah lut naw ni hai" ti thu a hril bok a.
6. Chanchin Tha dong hmasatuhai khan an ring naw leiin lut thei naw hai sien khom thenkhat ta ding ruok chun a chawlnaa lut theina a'n hong zing a nih.
7. Ei hril tah, 'Voisun hin a rawl in hriet chun in lungril sukngar naw ro' ti Davida hmanga hril kha kum tam tak hnungah Pathien chun ni dang, 'Voisun' a ti chu a hung ruot nawk tah a nih.
8. Josua khan, 'chawlnaa' chun thuoi lut ni sien, Pathienin hun dang ruot nawk ta naw nih.
9. Chuleiin, Pathien mihai ta dingin 'chawlna' hun dang a la um nawk ding a nih.
10. Pathienin a sinthaw a chawlsan ang bokin Pathien tiem chawlna changtuhai chu an sininrimnaa inthokin an la chawl ding a nih.
11. Ringnawna leia an tluk ang khan tu khom ei tluk ve nawna dingin, chu chawlnaa lut ding chun theitawp suo seng ei tiu.
12. Pathien thu chu a hring a, thil a thaw thei a,c kawlhnam ngei ton ieng ang nek khomin a ngei lem a, hringna le thlarau inzomna lai tak le ru le chang le thlin inchuktuona lai khom a sun tlang thei a, lungrila ngaituona le tumhai khom a hriet nghal thei a nih.
13. Pathien mita inthoka thup thei thilsiem ieng khom a um nawh. Ei chungthu ei hrilna ding mit hmua chu iengkim hi saruok le inhong sa vong a ni lem.
14. Chuongchun, vanahai khom fe thleng tah thiempu laltak le ropuitak Isu, Pathien Naupa chu ei nei leiin ei thuring hi chel tlat ei tiu.
15. Ei hratnawnahai mi hrepui phak lo thiempu laltak nei ei ni naw a, eini ang boka kong tinrenga thlemna tuok tah, suol ruok chu suol lo nei ei ni lem.
16. Chuongchun, thangpui ei ngai hun takah zangaina le lunginsietna ei hmu theina dingin, lunginsietna lalthungpha chu nel takin hnai ei tiu.
←  Hebrews (4/13)  →