←  Genesis (35/50)  →
1. Pathien chun Jakob kuomah, "Bethel chen hang fe la, chu taka chun umhmun khuor rawh. I u Esau kuoma inthoka i tlan siet laia i kuoma hung inlar Pathien ta dingin maicham siem rawh" a ta.
2. Jakob chun a sungkuohai le a kuoma um po po hai kuoma chun, "Hnam dang pathien in kolhai po po dehawn vong unla, insukthienghlim unla, in silfenhai thlak ro.
3. Chun, hung unla, Bethel chen hang feng ei ta, ka lungzing nia mi dontu le ka fena taphota mi umpuitu Pathien ta dingin maicham siem ka tih" a ta.
4. Chuongchun, ram dang pathien lem an kol po po le an nabehai chu Jakob kuomah an hung chawi a, ama chun Sekema thingsaisuo bula chun a phum a.
5. Chuongchun an fe suok a, an se vela khuo po po chunga chun Pathienin thlabarna hri a'n lengtir leiin tu khomin anni chu an hnot zui ngam nawh.
6. Jakob le a kuoma umhai po po chun Bethel chu an tlung a,
7. chu taka chun maicham a siem a; a u Esau kuoma inthoka a tlan siet laia a kuoma Pathien a hung inpuongna hmun a ni leiin chu hmun hminga chun El Bethely a'n buk a.
8. Chu hmuna chun Rebek dontu Debora chu a thi a, Bethela saisuo thing hnuoiah an phum a, a hmun hminga chun Alon Bakutchz a'n buk a.
9. Padan Arama inthoka Jakob a hung kir hin a kuomah Pathien a'n lar nawk a, mal a sawm a.
10. A kuomah, "I hming Jakob a na chu Jakob ti ta loin Israel ti lem tang an ti che" a ta, chuongchun hmingah 'Israel' a hung put tah a nih.
11. Pathien chun a kuomah, "Kei hi Iengkimthawthei Pathien chu ka nih. Suon tieng hmuingilin i thlahai hung pung raw hai se. Hnampui le hnam chi hrang hrang nangmaa inthokin hung suok an ta, lalhai khom hung suok bok an tih.
12. Abraham le Isak kuoma ka pek ram chu nang khom ka pek che a, hi ram hi i thlahai kuoma khom peng ka tih" a ta.
13. A biekna hmuna inthok chun Pathien chu a kai tung a.
14. Pathienin a biekna hmuna chun Jakobin lung a phun a, lunga chun dawn thilhlan uoin a buok a, sahriek a'n far khum bok a.
15. Pathienin a biekna hmun chu Jakobin 'Bethel' a'n buk a.
16. Bethela inthok chun hmun dang an zuon pei a. Efrat an tlung hma hla feah Rachel chun nau hase a'n voi a, a na inrim hle a.
17. Harsa taka san a pek lai chun a nau domtuin, "Lungngai der naw rawh, naupa i nei nawk a ni hih" a ta.
18. A thlarau an thla hma, a hrang chat lai chun a nau hmingah Ben Onia a sak a. A pa ruok chun Benjaminb a sak ve thung a.
19. Rachel chu a thi a, Efrat panna lampuia chun an phum a (Efrat chu Bethlehem a nih).
20. A thlan chunga chun Jakobin lung a phun a, voisun ni chen hin chu lungphun chu Rachel thlan inchikna a nih.
21. Israel chu a fe pei a, Migdal Eder khela chun puon in a kei a.
22. Hi hmuna Israel a um lai hin a hmei Bilha chu Reubenin a zalpui a, chu chu Israel khomin a hriet.
23. Jakob chun naupa sawmpahni a nei a, chuonghai chu: Lea naupahai chu Jakob nau lutir Reuben le Simeon, Levi, Juda, Isakar le Zebulun hai an nih.
24. Rachel naupahai chu Josefa le Benjamin an nih.
25. Rachel siehlawnu Bilha naupahai chu Dan le Naftali an nih.
26. Lea siehlawnu Zilpa naupahai chu Gad le Aser hai an nih. Hienghai hi Jakob naupahai, Padan Arama pienghai chu an nih.
27. Jakob chun a pa umna Kiriat Arba (Hebron an ti bok) bula um Mamre hmun, a pu Abraham le a pa Isak hai umna chu a hung tlung a.
28. Isak chu kum za le sawmriet a dam a.
29. Chu zoah a thlarau a'n thla a, tar kuna dam a, upa taka a thi chun a chipuihai kuoma thuoiin a um ve ta a, a nauhai Esau le Jakob chun an vui a.
←  Genesis (35/50)  →