←  Genesis (12/50)  →

---

1.

Chun, LALPAN Abram kuomah, "I ram le i laichinhai le i pa in suoksan la, ram ka la kawkhmu ding che tieng chu pan rawh.

2.

Hnam ropui takin siem ka ti che a, malsawm ka ti che a, i hming sukropui ka ta, malsawmna ning i tih.

3.

Malsawmtu che chu malsawm ka ta, tongsie inphurtu che chu tongsie inphur ka ta; nangma zarin hnam tin malsawmin um an tih" a ta.

4.

LALPAN a kuoma a hril angin Abram chu a'n thok suok a, Lota khomin a zui ve a. Haran a suoksan chun Abram chu kum sawmsari le kum nga mi a nih.

5.

Abram chun a nuhmei Sarai le a sang naupa Lota hai, a sum le pai khawl khawm po po le Haran khuoa a mi sorhai chu a thuoi a, Kanan ram panin an suok a.

6.

Kanan ram an tlung chun, Abram chu Sekem hmuna Morea saisaw thing bul chen a fe pei a. Chuong hun lai chun chu hmuna chun Kanan mihai an um a.

7.

Chun, LALPA chu Abram kuomah a hung inlar a "Hi ram hi i thlahai kuomah la peng ka tih" tiin a hril a. Chu taka a kuoma inlar LALPA ta dingin Abram chun maicham a siem a.

8.

Chu hmuna inthok chun Bethel sak tieng tlangah an inson a, chu taka chun puon in a kei a. Thlang tieng chun Bethel a um a, a sak tieng chun Ai khuo. Hi hmuna hin maicham a siem nawk a, LALPA hming a lam a.

9.

Chun, Abram chu Negeve tieng panin a fe ta pei a.

10.

Chun, chu rama chun tam a tla a. Tam chu a nasa em leiin Aigupta rama um hri dingin Abram chu a fe thla a.

11.

Aigupta an lut tawm chun a nuhmei Sarai kuomah, "Ngai ta, nu hmel tha tak i nih ti ka hriet a.

12.

Aigupta mihaiin an hmu pha che chu, 'Hi hi a nuhmei a nih' ting an ta, kei chu mi that an ta, nang chu hlang an ti che.

13.

I zara him taka ka um theina ding le ka hringna ka chan nawna dingin, 'A farnu ka nih' ti pei rawh" a ta.

14.

Abramin Aigupta ram a tlung chun Aigupta mihaiin a nuhmei chu hmel tha an ti hle a.

15.

Faraw hnuoia thoktuhaiin an hmu chun Faraw chu an hrilhmu a. Chuongchun, nuhmei chu Faraw inah an thuoi a.

16.

Ama lei chun Abram chu an duot hle a, beram hai, bawngchal hai, sabengtung chal le a pui hai, bawipa le bawinu hai le sanghawngsei hai a nei pha ta a.

17.

Nisienlakhom, Abram nuhmei Sarai lei chun LALPAN Faraw le a sungkuohai chu hripuiin a soisak a.

18.

Chuongchun, Faraw chun Abram chu a ko a, "Ka chunga i thilthaw hi ieng am an ta le? I nuhmei a nih ti ieng dinga i mi hril naw am a na?

19.

Ieng dinga 'Ka farnu a nih' i ti? Chu lei chun annawm nuhmei dinga ka thuoi chu. Tu hin i nuhmei hi thuoi la, fe dai rawh" a ta.

20.

Faraw chun a mihai chu Abram chunga an thaw dan ding thu a pek a, a nuhmei le a thil neihai po po le chun an inthla liem ta a.

---

←  Genesis (12/50)  →